დიდი ბრიტანეთის პრემიერ-მინისტრმა კირ სტარმერმა მოუწოდა შეერთებულ შტატებს, მხარი დაუჭიროს ევროპელ სამშვიდობოების განლაგებას უკრაინაში. იუწყება Reuters
მისი თქმით, მხოლოდ ეს იქნება გრძელვადიანი მშვიდობის გარანტი და არა დროებითი ცეცხლის შეწყვეტის.
ვაშინგტონში ვიზიტის წინ, სტარმერმა თქვა, რომ ბრიტანეთი მზად არის როლი ითამაშოს უკრაინაში შესაძლო სამშვიდობო მისიაში, მაგრამ მხოლოდ იმ შემთხვევაში, თუ იგი მიიღებს აშშ-ის მხარდაჭერას.
მას შემდეგ, რაც ტრამპმა უარი თქვა აშშ-ის მიერ უკრაინის მხარდაჭერის წინა კურსზე, დიდი ბრიტანეთი და ევროპის სხვა ქვეყნები ცდილობენ გამოიჩინონ ერთიანობა და გააძლიერონ დიპლომატიური ძალისხმევა კიევის მხარდასაჭერად.
თუმცა უკრაინაში სამშვიდობოების გაგზავნასთან დაკავშირებით უთანხმოებაა: საფრანგეთი და დიდი ბრიტანეთი მზად არიან ასეთი ნაბიჯისთვის, პოლონეთი კი კატეგორიულად უარყოფს.
რუსეთმა, თავის მხრივ, უკვე განაცხადა, რომ უკრაინაში ევროპული ჯარების განლაგების "არანაირ ვარიანტს არ მიიღებს".
სტარმერმა ხაზგასმით აღნიშნა, რომ ტრამპის მხარდაჭერა მთავარი საკვანძო საკითხია სამშვიდობო გადაწყვეტისთვის, თუმცა მისი ფორმატი ჯერ არ არის განსაზღვრული.
”მე აბსოლუტურად დარწმუნებული ვარ, რომ ჩვენ გვჭირდება ხანგრძლივი მშვიდობა და არა ცეცხლის შეწყვეტა და ეს მოითხოვს უსაფრთხოების გარანტიებს”, - თქვა სტარმერმა.
არასაკმარისმა მხარდაჭერამ შეიძლება შექმნას რუსეთის მხრიდან მორიგი თავდასხმის რისკი, თქვა მან.
„მე შეშფოთებული ვარ, რომ თუ ცეცხლის შეწყვეტა იქნება უსაფრთხოების გარეშე, ეს მხოლოდ მისცემს მას [პუტინს] შესაძლებლობას მოიცადოს და შემდეგ კვლავ შეუტიოს. მისი ამბიციები უკრაინასთან დაკავშირებით ყველასთვის აშკარაა“, - აღნიშნა სტარმერმა.
