რუმინეთის პრეზიდენტობის კანდიდატი, კალინ ჯორჯესკუ პოლიციამ დაკითხვის მიზნით დააკავა. ინფორმაციას Politico ავრცელებს.
Pგამოცემის ცნობით, კალინ ჯორჯესკუ ხელახალი საპრეზიდენტო არჩევნებისთვის კანდიდატურის დარეგისტრირებას აპირებდა, როდესაც პოლიციამ მისი ავტომობილი გააჩერა და დაკითხვის მიზნით გენერალურ პროკურატურაში გადაიყვანეს.
რუმინული ტელეარხის, Antena 3 CNN-ის ცნობით, ჯორჯესკუს დაკითხვა შეეხება გასულ წელს მისი საარჩევნო კამპანიის დაფინანსებას.
Politico-ს ინფორმაციით, პროკურორები ეჭვობენ, რომ 27 ადამიანი მოქმედებდა რუმინეთის კონსტიტუციის წინააღმდეგ საჯარო წაქეზებით, ფაშისტური ორგანიზაციის შექმნითა და საარჩევნო კამპანიის დაფინანსების წყაროების შესახებ ყალბი განცხადებებით. თუმცა პროკურორებს განცხადებაში ჯორჯესკუ ან მისი თანაშემწეები არ დაუსახელებიათ.
კალინ ჯორჯესკუმ გასული წლის ნოემბერში გამართულ რუმინეთის საპრეზიდენტო არჩევნების პირველ ტურში გაიმარჯვა. მოგვიანებით რუმინეთის საკონსტიტუციო სასამართლომ არჩევნების შედეგები გააუქმა, მას შემდეგ რაც ქვეყნის უსაფრთხოების სამსახურებმა განაცხადეს, რომ რუსეთი რუმინეთის წინააღმდეგ ჰიბრიდულ თავდასხმებს ახორციელებდა.
ხელახალი საპრეზიდენტო არჩევნების პირველი ტური 4 მაისს, ხოლო მეორე ტური 18 მაისს გაიმართება.
