სააგენტო Reuters-ის ცნობით, ამერიკელებმა და რუსებმა ბოლო თვეებში რამდენჯერმე გამართეს საიდუმლო შეხვედრა შვეიცარიაში, რათა ემსჯელათ უკრაინაში გაჩაღებული ომის შესახებ.
როგორც Reuters-ი, სამ ინფორმირებულ წყაროზე დაყრდნობით წერს, ერთ-ერთი ასეთი შეხვედრა გასულ კვირას ჟენევაში, მიუნხენის უსაფრთხოების საერთაშორისო კონფერენციის პარალელურად გაიმართა.
წყაროების ინფორმაციით, რუსეთსა და აშშ-ს შორის არაოფიციალური არხი გაიხსნა საპრეზიდენტო არჩევნებში დონალდ ტრამპის გამარჯვებიდან მალევე.
ინფორმირებული წყაროები უარს ამბობენ მოლაპარაკებებში ჩართული პირების ვინაობის დასახელებაზე, მაგრამ აცხადებენ, რომ ისინი იყვნენ არა ხელისუფლების წარმომადგენლები, არამედ დიპლომატიური და უსაფრთხოების სფეროს გამოცდილების მქონე პირები.
ასევე იუწყებიან, რომ ტრამპის ზოგიერთი მრჩეველი ინფორმირებული იყო ასეთი შეხვედრების თაობაზე.
ბევრი დეტალი კვლავ გაურკვეველია, მათ შორის, რა საკითხები განიხილეს შეხვედრებზე და ესწრებოდნენ თუ არა მას უკრაინელები, ასევე, რა მომენტიდან მიმდინარეობს მოლაპარაკებები.
რამდენიმე დღის წინ, საუდის არაბეთის დედაქალაქ ერ-რიადში გაიმართა რუსეთისა და შეერთებული შტატების დელეგაციების შეხვედრა.
18 თებერვალს გამართულ შეხვედრაში მონაწილეობდნენ აშშ-ის სახელმწიფო მდივანი მარკო რუბიო, აშშ-ის ეროვნული უსაფრთხოების მრჩეველი მაიკ უოლცი, ტრამპის სპეციალური წარმომადგენელი ახლო აღმოსავლეთში სტივ უიტკოფი, რუსეთის საგარეო საქმეთა მინისტრი სერგეი ლავროვი, რუსეთის პრეზიდენტის თანაშემწე იური უშაკოვი და რუსეთის პირდაპირი ინვესტიციების ფონდის ხელმძღვანელი კირილ დმიტრიევი.
შეხვედრის ერთ-ერთი მთავარი თემა უკრაინაში მიმდინარე ომი იყო. მოლაპარაკებებში არ მონაწილეობდნენ ევროკავშირისა და უკრაინის წარმომადგენლები. შეხვედრის შემდეგ მხარეები ასევე შეთანხმდნენ შემდეგ რაუნდზე, რათა განიხილონ უკრაინაში რუსეთის ომის დასრულება.
