საფრანგეთის პრეზიდენტმა ემანუელ მაკრონმა დაადასტურა, რომ მომავალ კვირას ვაშინგტონში ამერიკელ კოლეგას დონალდ ტრამპს შეხვდება.
მაკრონმა სოციალურ მედიაში გამართულ კითხვა-პასუხის სესიაში მიიღო მონაწილეობა.
მაკრონმა თქვა, რომ იცნობს ტრამპს და ისინი პატივს სცემენ ერთმანეთს.
მისი თქმით, მომავალ კვირას ვაშინგტონში წავა, რათა დაარწმუნოს აშშ-ს პრეზიდენტი, რომ საერთო ინტერესები აქვთ, რასაც არ უნდა ფიქრობდეს ის.
„მე მას ვეტყვი: „სიღრმისეულად, შენ არ შეიძლება იყო სუსტი პუტინის წინაშე, ეს შენ არ ხარ, ეს არ არის შენი ხასიათი, ეს არ არის შენი საფირმო ნიშანი, ეს არ შედის შენ ინტერესებში. მე ვეტყვი, რომ თუ უკრაინას დათმობ, რუსეთი არ შეჩერდება. ის არა მხოლოდ გაძლიერდება და გააგრძელებს ინვესტიციას [სამხედრო ინდუსტრიაში], არამედ ხელში ჩაიგდებს უკრაინას და მის არმიას, რომელიც ევროპაში ერთ-ერთი ყველაზე დიდია, ყველა იმ აღჭურვილობით, რომელიც ჩვენ მივაწოდეთ, მათ შორის ამერიკული.’ [ეს იქნებოდა] უზარმაზარი სტრატეგიული შეცდომა“, - თქვა საფრანგეთის პრეზიდენტმა.
თეთრმა სახლმა საფრანგეთის პრეზიდენტის ვიზიტი 24 თებერვალს ოფიციალურად დაადასტურა.
