სტატისტიკის ეროვნული სამსახურის ინფორმაციით, 2024 წელს უმუშევრობის ისტორიული მინიმუმი დაფიქსირდა. უმუშევრობის დონე 2024 წელს 2.5 პროცენტული პუნქტით შემცირდა და 13.9 პროცენტი შეადგინა.

სამსახურის ცნობით, დაფიქსირდა დასაქმებულთა რეკორდული ოდენობა. 2024 წელს დასაქმებულთა რაოდენობა 67.9 ათასით გაიზარდა და მილიონ 402 ათასი შეადგინა.

"დასაქმების დონე 2.6 პროცენტული პუნქტით გაიზარდა და 47.1 პროცენტი შეადგინა. რეკორდულად დაბალია უმუშევართა რაოდენობაც, რომელიც 34.7 ათასით შემცირდა და 227 ათასს გაუტოლდა.

ბოლო სამი წლის განმავლობაში სტაბილურად ფიქსირდება უმუშევრობის შემცირების და დასაქმების ზრდის ტენდენციები. კერძოდ, 2021 წელთან შედარებით უმუშევრობის დონე 6.7 პროცენტული პუნქტით არის შემცირებული, ხოლო დასაქმებულთა რაოდენობა 185 ათასით არის გაზრდილი.

დაქირავებით დასაქმებულთა რაოდენობა 2024 წელს წინა წელთან შედარებით 40 ათასით გაიზარდა და 960.4 ათასს გაუტოლდა, ხოლო თვითდასაქმებულთა რიცხოვნობა 27.9 ათასით გაიზარდა და 441.5 ათასი შეადგინა.

კვარტალურ ჭრილში, 2024 წლის მეოთხე კვარტალში, გაგრძელდა უმუშევრობის შემცირების და დასაქმების მზარდი დინამიკა და უმუშევრობის დონემ მეოთხე კვარტლის ისტორიულ მინიმუმს მიაღწია.

2024 წლის მეოთხე კვარტალში უმუშევრობის დონე წინა წლის მეოთხე კვარტალთან შედარებით - 1.1 პროცენტული პუნქტით შემცირდა და 14.2 პროცენტი შეადგინა", - იუწყება საქსტატი.