უკრაინაში სრულმასშტაბიანი სამხედრო აგრესიის გამო, ევროკავშირი რუსეთის წინააღმდეგ სანქციების მე-16 პაკეტზე შეთანხმდა.
როგორც ევროკავშირის საბჭოს ამჟამინდელმა თავმჯდომარემ, პოლონეთმა განაცხადა, შეზღუდვები ძალაში 2025 წლის 24 თებერვალს, რუსეთის უკრაინაში შეჭრის მესამე წლისთავზე შევა.
როგორც იტყობინებიან, ახალი სანქციების პაკეტის ფარგლებში, კიდევ 13 რუსული ბანკი გაითიშება SWIFT-ის საერთაშორისო სისტემიდან.
გარდა ამისა, რვა რუსული მედიაკომპანია დაკარგავს ევროკავშირში საქმიანობის ლიცენზიას.
სანქციების ახალი პაკეტის ფარგლებში დაწესდება ფართო აკრძალვა რუსული ალუმინისა და ალუმინის შენადნობების იმპორტზე. ასევე აიკრძალება იმ მოწყობილობების ექსპორტი, რომელიც შესაძლოა, გამოყენებულ იქნეს საბრძოლო თვითმფრინავებისთვის. მაგალითად, ვიდეოთამაშების PlayStation-ისა და Xbox-ის სათამაშო კონსოლების ექსპორტი.
ამავდროულად, ევროკავშირი გაამკაცრებს ბრძოლას რუსეთის ე.წ. „ჩრდილოვანი ფლოტის“ წინააღმდეგ. მე-16 პაკეტით, შეზღუდვები დაუწესედება კიდევ 73 ტანკერს.
ამ ფლოტის შემადგენლობაში არიან ტანკერები, რომელთაც საერთაშორისო სანქციების გვერდის ავლით, რუსეთიდან ნავთობიზ გადაზიდვებს ახორციელებენ. ახალი შეზღუდვების თანახმად, სანქციები დაუწესდებათ „ჩრდილოვან ფლოტში“ შემავალი ხომალდების კაპიტნებსა და მფლობელებს.
რუსეთის "ჩრდილოვანი ფლოტის" წინააღმდეგ ბრძოლის ფარგლებში, გასულ წელს ევროკავშირმა 80 ხომალდს აუკრძალა თავის პორტებსა და ნავსადგურებში შესვლა. ამასთან, მესამე მხარის კომპანიებს აეკრძალათ ასეთი ხომალდებისთვის მომსახურების გაწევა.
