აშშ-ის სახელმწიფო მდივანმა მარკო რუბიომ ევროპელ მოკავშირეებს განუცხადა, რომ შეერთებული შტატები არ გააუქმებს რუსეთის წინააღმდეგ სანქციებს, ვიდრე არ მიიღწევა შეთანხმება უკრაინაში ომის დასრულების შესახებ. ამის შესახებ Bloomberg იუწყება.
გამოცემის ცნობით, რუბიომ ეს განცხადება 18 თებერვალს, საუდის არაბეთში, ერ-რიადში, ამერიკისა და რუსეთის დელეგაციების მოლაპარაკებების შემდეგ, ევროპელ ოფიციალურ პირებთან სატელეფონო საუბრისას გააკეთა.
მანამდე მან ხაზგასმით აღნიშნა, რომ ომის დასრულების შესახებ ნებისმიერი შეთანხმება მოითხოვს დათმობებს ყველა მხრიდან, მათ შორის სანქციებთან დაკავშირებით.
„ნებისმიერი კონფლიქტის დასრულების მიზნით, ყველა მხარე დათმობებზე უნდა წავიდეს“, - განუცხადა რუბიომ ჟურნალისტებს.
მან ასევე თქვა, რომ შეთანხმების მიღწევა გახსნის "წარმოუდგენელ შესაძლებლობებს რუსებთან პარტნიორობისთვის, გეოპოლიტიკური თვალსაზრისით საერთო ინტერესისა და ეკონომიკურ საკითხებზე.
„ბევრი შეზღუდვა დაწესდა ევროპელ პარტნიორებთან მჭიდრო თანამშრომლობით. შეერთებული შტატების მიერ სანქციების ნაადრევმა მოხსნამ, შესაძლოა, მნიშვნელოვნად გაართულოს ევროპის ძალისხმევა მოსკოვის ფინანსური იზოლაციისთვის“, - განაცხადა რუბიომ.
