საუდის არაბეთში რუსეთისა და შეერთებული შტატების დელეგაციებს შორის მოლაპარაკებები დასრულდა. რუსეთის პრეზიდენტის თანაშემწის იური უშაკოვის თქმით, მოლაპარაკებას ცუდად არ ჩაუვლია.
„იყო ძალიან სერიოზული საუბარი ყველა იმ საკითხზე, რისი დაყენებაც გვინდოდა“, – განაცხადა მან.
მისი თქმით, რუსეთი და შეერთებული შტატები შეთანხმდნენ, რომ გაითვალისწინებენ ერთმანეთის ინტერესებს და გააძლიერებენ ორმხრივ ურთიერთობებს, რადგან ამით ორივე მხარეა დაინტერესებული.
როგორც უშაკოვმა აღნიშნა, მომავალ კვირას ვლადიმირ პუტინისა და დონალდ ტრამპის შეხვედრა ნაკლებად სავარაუდოა. საჭიროა კონკრეტულ თარიღებზე საუბარი.
მისივე თქმით, მოსკოვი და ვაშინგტონი იმუშავებენ ლიდერთა შეხვედრისთვის პირობების შესაქმნელად.
მხარეებმა ერთმანეთს წარუდგინეს ფუნდამენტური მიდგომები უკრაინაში შექმნილი სიტუაციის მიმართ.
იური უშაკოვმა ასევე განაცხადა, რომ რუსეთისა და აშშ-ის მომლაპარაკებელთა ცალკე ჯგუფები უკრაინის საკითხზე კონტაქტებს თავის დროზე დაიწყებენ. მისი თქმით, გადაწყვეტილებას იმასთან დაკავშირებით თუ ვინ შევა მომლაპარაკებელთა ჯგუფში რუსეთიდან პრეზიდენტი პუტინი მიიღებს.
ამასთან, უკრაინის საკითხზე მოლაპარაკებებზე წარმომადგენელი ჯერ არც აშშ-საც დაუნიშნავს.
ერ-რიადში დღეს გამართული მოლაპარაკებები ბოლო რამდენიმე წლის განმავლობაში აშშ-სა და რუსეთს შორის მაღალი დონის პირველი შეხვედრა იყო.
მოლაპარაკებებში რუსეთის დელეგაციას საგარეო საქმეთა მინისტრი სერგეი ლავროვი და იური უშაკოვი წარმოადგენდნენ.
აშშ-ის დელეგაციაში წარმოდგენილი იყვნენ სახელმწიფო მდივანი მარკო რუბიო, თეთრი სახლის ეროვნული უსაფრთხოების მრჩეველი მაიკ უოლცი და ახლო აღმოსავლეთში პრეზიდენტის წარმომადგენელი სტივ უიტოფი.
