სამშაბათს, 18 თებერვალს, ევროკომისიის პრეზიდენტი ურსულა ფონ დერ ლაიენი აშშ-ის სპეციალურ წარმომადგენელს უკრაინასა და რუსეთში კიტ კელოგს შეხვდა.
ბრიუსელში შეხვედრისას ფონ დერ ლაიენმა აღნიშნა ევროკავშირის მნიშვნელოვანი როლი ფინანსური სტაბილურობისა და უკრაინის თავდაცვის უზრუნველყოფაში. მისი თქმით, საერთო ჯამში ევროკავშირის ვალდებულება უკრაინის მიმართ არის 135 მილიარდი ევრო - მეტი, ვიდრე ნებისმიერი სხვა მოკავშირის. 52 მილიარდი დოლარის სამხედრო დახმარება კი შეესაბამება აშშ-ის შეტანილ წვლილს.
მან ისაუბრა ევროპის გეგმებზე წარმოების მოცულობისა და თავდაცვის ხარჯების გაზრდის შესახებ, რაც გააძლიერებს როგორც ევროპის, ისე უკრაინის სამხედრო პოტენციალს.
ევროკომისიის პრეზიდენტმა ხაზგასმით აღნიშნა, რომ ევროკავშირს უკრაინას სამხედრო დახმარებაში თავისი წილი სრულად შეაქვს და მზადაა კიდევ მეტი გააკეთოს.
ფონ დერ ლაიენმა კიდევ ერთხელ დაადასტურა ევროკავშირის ერთგულება სამართლიანი და ხანგრძლივი მშვიდობისადმი და ხაზგასმით აღნიშნა, რომ ნებისმიემა გადაწყვეტილებამ პატივი უნდა სცეს უკრაინის დამოუკიდებლობას, სუვერენიტეტსა და ტერიტორიულ მთლიანობას, რომელიც გამყარებული იქნება საიმედო უსაფრთხოების გარანტიებით.
„მან ასევე გამოხატა ევროკავშირის მზადყოფნა იმუშაოს აშშ-სთან ერთად, რათა დასრულდეს სისხლისღვრა და დაეხმაროს სამართლიანი და ხანგრძლივი მშვიდობის უზრუნველყოფას, რომელსაც უკრაინა და მისი ხალხი სამართლიანად იმსახურებენ. როგორც პრეზიდენტმა განმარტა, ეს არის კრიტიკული მომენტი“, - ნათქვამია განცხადებაში.
