ევროპელი ლიდერების საგანგებო სამიტის შემდეგ, საფრანგეთის პრეზიდენტმა ემანუელ მაკრონმა განაცხადა, რომ უკრაინაში მშვიდობა შესაძლებელია მხოლოდ იმ შემთხვევაში, თუ შეჩერდება რუსული აგრესია და უზრუნველყოფილი იქნება უკრაინის უსაფრთხოების ძლიერი და საიმედო გარანტიები.
მან ხაზგასმით აღნიშნა, რომ ასეთი გარანტიების გარეშე არსებობს მინსკის შეთანხმებების სცენარის გამეორების რისკი, რომელმაც გრძელვადიანი მშვიდობა ვერ მოიტანა.
ევროკავშირის ლიდერებთან საგანგებო სამიტის შემდეგ, საფრანგეთის პრეზიდენტმა ემანუელ მაკრონმა მოლაპარაკებები გამართა აშშ-ს პრეზიდენტ დონალდ ტრამპთან და უკრაინის პრეზიდენტ ვოლოდიმირ ზელენსკისთან.
საფრანგეთის ლიდერმა აღნიშნა, რომ სტაბილური მშვიდობის მისაღწევად საჭიროა არა მხოლოდ ცეცხლის შეწყვეტა, არამედ უკრაინის უსაფრთხოების გარანტიის საიმედო მექანიზმების შექმნა.
მაკრონმა აღნიშნა, რომ ასეთი გარანტიების გარეშე, ნებისმიერი ცეცხლის შეწყვეტის შეთანხმება შეიძლება ისეთივე არაეფექტური აღმოჩნდეს, როგორც მინსკის შეთანხმებები, რომლებმაც ვერ შეაჩერეს კონფლიქტის ესკალაცია.
„ამაზე ვიმუშავებთ ყველა ევროპელთან, ამერიკელთან და უკრაინელთან ერთად, ეს არის საკვანძო მომენტი.
ჩვენ დარწმუნებულები ვართ, რომ ევროპელებმა უკეთესი, მეტი და ერთობლივი ინვესტიცია უნდა განახორციელონ თავიანთ უსაფრთხოებასა და თავდაცვაში - როგორც დღეს, ასევე მომავალში“, - დაწერა მაკრონმა X-ზე.
გარდა ამისა, საფრანგეთის პრეზიდენტმა ხაზი გაუსვა ევროპის თავდაცვის გაძლიერებისა და 2022 წელს ვერსალის სამიტზე განსაზღვრული ევროკავშირის სუვერენიტეტისა და უსაფრთხოების სტრატეგიის განხორციელების დაჩქარებას.
მისი თქმით, ევროკომისია გააგრძელებს მუშაობას უკრაინის მხარდასაჭერად.
