აშშ-ის სახელმწიფო დეპარტამენტის პრესსპიკერის ტემი ბრიუსის განცხადებით, აშშ-ის ადმინისტრაცია საუდის არაბეთის დედაქალაქ ერ-რიადში რუსეთის დელეგაციასთან შეხვედრას განიხილავს არა როგორც უკრაინის შესახებ "მოლაპარაკებების" დასაწყისს, არამედ როგორც პრეზიდენტ დონალდ ტრამპსა და ვლადიმირ პუტინს შორის სატელეფონო საუბრის გაგრძელებას.
„არ ვფიქრობ, რომ ხალხმა ეს უნდა განიხილოს, როგორც რაიმე მოლაპარაკებისდეტალი ან პროგრესი“, - განაცხადა ბრიუსმა.
მანამდე ანალოგიური განცხადება გააკეთა რუსეთის დელეგაციის წევრმა, რუსეთის პრეზიდენტის თანაშემწემ, იური უშაკოვმა. მისი თქმით, საუდის არაბეთში რუსეთისა და შეერთებული შტატების დელეგაციები განიხილავენ, თუ როგორ უნდა დაიწყოს მოლაპარაკებები უკრაინასთან დაკავშირებით.
„ახლა საკითხავია, როგორ შევთანხმდეთ იმაზე, თუ როგორ უნდა დაიწყოს მოლაპარაკებები უკრაინაზე, რადგან ამერიკულ მხარეს ჯერ არ დაუნიშნავს მთავარი მომლაპარაკებელი, რომელიც ჩვენთან საქმის წარმოებას შეძლებს“, - განმარტა უშაკოვმა.
18 თებერვალს მოლაპარაკებებს უშაკოვის გარდა რუსეთის საგარეო საქმეთა მინისტრი სერგეი ლავროვიც ესწრება.
ამერიკული დელეგაციის შემადგენლობაში არიან სახელმწიფო მდივანი მარკო რუბიო, აშშ-ის ეროვნული უსაფრთხოების მრჩეველი მაიკ უოლცი და სპეციალური წარმომადგენელი ახლო აღმოსავლეთში სტივ ვიტკოფი.
უკრაინის პრეზიდენტმა ვოლოდიმირ ზელენსკიმ დაადასტურა, რომ უკრაინის წარმომადგენლები საუდის არაბეთში არ მიიღებენ მონაწილეობას აშშ-სა და რუსეთის დელეგაციების შეხვედრაში.
