ევროკავშირმა უნდა მიიღოს მონაწილეობა რუსეთთან სამშვიდობო მოლაპარაკებებში, რათა გამოკვეთოს ევროპის მომავალი უსაფრთხოების არქიტექტურა. ამის შესახებ განაცხადა ევროპული საბჭოს პრეზიდენტმა ანტონიო კოშტამ.
ომისი აზრით, თუ აშშ-ის პრეზიდენტს დონალდ ტრამპს „ნამდვილად სურს, რომ ევროპელებმა მეტი პასუხისმგებლობა აიღონ თავიანთ უსაფრთხოებაზე, მაშინ, რა თქმა უნდა, ევროპელები უნდა იყვნენ ძირითადი მოთამაშეები უსაფრთხოების ახალი არქიტექტურის შემუშავებაში“, - თქვა კოშტამ Financial Times-თან ინტერვიუში.
ევროპული საბჭოს პრეზიდენტმა, ასევე აღნიშნა, რომ რუსეთი დღეს გლობალურ საფრთხეს წარმოადგენს.
„ეს მხოლოდ უკრაინას არ ეხება. უსაფრთხოების ახალ არქიტექტურაზე მოლაპარაკებებისას უნდა გაითვალისწინონ, რომ რუსეთი გლობალური საფრთხეა და არა მხოლოდ უკრაინისთვის“, - აღნიშნა კოშტამ და ხაზი გაუსვა, რომ კრემლი აგრესიულ პოზიციას იკავებს ბალტიის ქვეყნების - ესტონეთის, ლატვიისა და ლიეტუვის მიმართ, რომლებიც ევროკავშირისა და ნატო-ს წევრები არიან.
მან ასევე აღნიშნა, რომ რუსეთის პრეზიდენტს ვლადიმირ პუტინს აქვს დასაყრდენი ოკუპირებული ტერიტორიების სახით მოლდოვასა და საქართველოში.
„რუსეთი აშკარად არის საფრთხე ბალტიის სუვერენიტეტისთვის, ჩვენი აღმოსავლეთ საზღვრისთვის. რუსებს განთავსებული ჰყავთ სამხედრო ძალები მოლდოვაში, საქართველოში“, – აღნიშნა ევროპული საბჭოს პრეზიდენტმა.
