უკრაინის პრეზიდენტი ვოლოდიმირ ზელენსკი 18 თებერვალს თურქეთს ეწვევა და ქვეყნის პრეზიდენტს, რეჯეფ თაიფ ერდოღანს შეხვდება.
ზელენსკი თურქეთში ერდოღანის მიწვევით ოფიციალური ვიზიტით ჩავა.
უკრაინის პრეზიდენტის თურქეთში ვიზიტთან დაკავშირებით თურქეთის პრეზიდენტის ადმინსიტრაციის ცნობით, შეხვედრების დროს განიხილება თურქეთსა და უკრაინას შორის სტრატეგიული პარტნიორული ურთიერთობების ყველა ასპექტი და ნაბიჯები, რომლებიც უნდა გადაიდგას ორ ქვეყანას შორის თანამშრომლობის შემდგომი გაძლიერების მიზნით.
„ვიზიტის ფარგლებში ასევე იქნება აზრთა გაცვლა-გამოცვლა უკრაინის უახლეს მოვლენებზე და სხვა რეგიონულ და გლობალურ საკითხებზე“, - აღნიშნავენ ადმინისტრაციაში.
ზელენსკიმ, რომელიც გასულ კვირას მიუნხენის უსაფრთხოების 61-ე კონფერენციას დაესწრო, იქ გამართულ პრესკონფერენციაზე წარადგინა თავისი დაგეგმილი საგარეო ვიზიტები და თქვა, რომ არაბეთის გაერთიანებულ საემიროებში კონტაქტების შემდეგ ის გაემგზავრება საუდის არაბეთსა და თურქეთში.
