სირიის მოქალაქე, რომელიც გამვლელებს დანით დაესხა თავს ავსტრიის ქალაქ ვილახში, დაკავშირებული იყო ტერორისტულ დაჯგუფება “ისლამურ სახელმწიფოსთან”[ISIS].
ამის შესახებ ჟურნალისტებს ავსტრიის შინაგან საქმეთა მინისტრმა გერჰარდ კარნერმა განუცხადა. მინისტრმა ინციდენტს ISIS-თან დაკავშირებული ისლამისტური თავდასხმა უწოდა.
მისი ბინის ჩხრეკისას რადიკალური ისლამისტური იდეების აშკარა მტკიცებულებები და კედელზე „ისლამური სახელმწიფოს“ დროშა იპოვეს. იქ იარაღი ან „სხვა საშიში საგნები“ არ აღმოჩენილა.
გამოძიება ვარაუდობს, რომ დამნაშავე მარტო მოქმედებდა.
კარნერმა თქვა, რომ აპირებენ ჩაატარონ თავშესაფრის მაძიებელი სირიელი ან ავღანური წარმომავლობის პირების მასობრივი შემოწმებები, რათა თავიდან იქნას აცილებული მსგავსი თავდასხმები.
გერმანელმა ექსპერტმა ტერორიზმის საკითხებში, ლონდონის სამეფო კოლეჯის პროფესორმა პეტერ ნოიმანმა განაცხადა, რომ ისლამისტების თავდასხმები მიუნხენსა და ვილახში არის "ჯიჰადის ტალღის ნაწილი, რომელიც გამოცხადდა რამდენიმე თვის წინ".
შაბათს, 15 თებერვალს, სამხრეთ ავსტრიის ქალაქ ვილახში, 23 წლის კაცმა ხუთი გამვლელი დანით დაჭრა და ერთი მოკლა.
