აშშ-ის სახელმწიფო მდივანმა მარკო რუბიომ განაცხადა, რომ მომდევნო დღეები და კვირები განსაზღვრავს, არის თუ არა რუსეთის პრეზიდენტი ვლადიმირ პუტინი დაინტერესებული უკრაინაში მშვიდობით. ამისშესახებ მან CBS News-თან ინტერვიუში განაცხადა.
რუბიოს ჰკითხეს, მართლა სჯერა, რომ ვლადიმირ პუტინი მზად არის თუ არა მოლაპარაკებისთვის ან ომის დასასრულებლად დათმობაზე წასვლაზე.
„პრეზიდენტმა ტრამპმა გასულ კვირას ისაუბრა ვლადიმირ პუტინთან და ამ საუბარში ვლადიმირ პუტინმა გამოხატა თავისი ინტერესი მშვიდობისადმი პრეზიდენტმა [ტრა,პმა] გამოთქვა სურვილი, რომ დასრულდეს ეს კონფლიქტი ისე, რომ იყოს გრძელვადიანი და დაიცვას უკრაინის სუვერენიტეტი და რომ ეს იყოს ხანგრძლივი მშვიდობა... ეს სწორი გადაწყვეტილებაა.
ცხადია, რომ საჭიროა ქმედება, ასე რომ, მომდევნო რამდენიმე კვირა და დღე განსაზღვრავს რამდენად სერიოზულია ეს ან არა. „ბოლოს და ბოლოს, მშვიდობა ერთი სატელეფონო ზარით არ დამყარდება“, - განაცხადა აშშ-ის სახელმწიფო მდივანმა.
მან დასძინა, რომ ეს არის პირველი ნაბიჯი ამ პროცესში, მაგრამ „წინ ჯერ კიდევ გრძელი გზაა“.
„კიდევ ერთხელ გავიმეორებ, ერთი ზარის, ერთი შეხვედრის იმედად ვერ ვიქნებით, წინ ჯერ კიდევ ბევრი სამუშაოა. მაგრამ მე მიმაჩნია, რომ ყველაზე გრძელი მოგზაურობაც კი პირველი ნაბიჯით იწყება. ვნახოთ, რა მოხდება შემდეგ, იმედია რამე კარგი იქნება“, - დასძინა რუბიომ.
მან აღნიშნა, რომ ის ასევე იქნება საუდის არაბეთში, სადაც აშშ-ის სპეციალური წარმომადგენელი ახლო აღმოსავლეთში სტივ ვიტკოფი და ეროვნული უსაფრთხოების მრჩეველი მაიკ უოლცი კვირას რუსეთის წარმომადგენლებთან მოლაპარაკებებზე მიემგზავრებიან.
