შეერთებული შტატების პრეზიდენტის დონალდ ტრამპის სპეციალურმა წარმომადგენელმა უკრაინასა და რუსეთში კიტ კელოგმა მიუნხენის უსაფრთხოების საერთაშორისო კონფერენციის ფარგლებში პანელის დისკუსიის დროს განაცხადა, რომ რუსეთს მოუწევს დათმობებზე წასვლა უკრაინაში ომის დასასრულებლად.
კელოგის თქმით, ეს დათმობები შეიძლება ეხებოდეს ტერიტორიებს ან შეიძლება შეიცავდეს "ძალის გამოყენებაზე უარის თქმას". იუწყება CNN.
ტრამპის სპიკერმა აღნიშნა, რომ რუსეთის პრეზიდენტ ვლადიმირ პუტინს „არ აქვს განზრახული თავისი შეიარაღებული ძალების შემცირება“, მაგრამ ვაშინგტონი იმედოვნებს, რომ „აიძულებს“ მას განახორციელოს ისეთი ქმედებები, რომლებიც მისთვის „სასიამოვნო არ არის“.
კელოგი მიიჩნევს, რომ შეერთებულ შტატებს შეუძლია მიაღწიოს ალიანსების განადგურებას, რომლებიც რუსეთმა ბოლო წლებში შექმნა ირანთან, ჩრდილოეთ კორეასთან და ჩინეთთან.
ამერიკელმა დიპლომატმა ასევე აღნიშნა, რომ რუსეთი, პირველ რიგში, არის ქვეყანა, რომელიც აწარმოებს წიაღისეულ ნახშირწყალბადებს. მისი თქმით, იმ თანხის 70%, რომელსაც ისინი იღებენ ამ ომის დასაფინანსებლად, ნავთობიდან და გაზიდან მოდის.
„ეს კი დიდწილად შესაძლებელს ხდის ჩრდილოვან ფლოტს“, - თქვა კელოგმა.
მისივე თქმით, შეერთებულმა შტატებმა შეიძლება შეამციროს პუტინის შემოსავალი უფრო მკაცრი სანქციების დაწესებით, რაც მოსკოვის „ეკონომიკურ ხერხემალს“ დაარღვევს.
ტრამპის სპეციალურმა წარმომადგენელმა რუსეთის წინააღმდეგ ამჟამინდელი სანქციები შეაფასა, როგორც „ათიდან სამი ქულა“.
მისივე თქმით, მას, ვინც იმედოვნებს, რომ რუსეთი ომში თავის ადამიანურ ძალას ამოწურავს, „ისტორია ცუდად იცის“, რადგან ქვეყანა მომზადებული იყო მეორე მსოფლიო ომის დროს სტალინგრადის ბრძოლაში დიდი რაოდენობით ჯარისკაცის დასაკარგად და ახლა მზად არის ასობით ათასი თავისი ჯარისკაცის სიცოცხლე გაწიროს უკრაინის ომში.
