მჯერა, რომ ეს დრო დადგა, უნდა შეიქმნას ევროპის შეიარაღებული ძალები, – ამის შესახებ უკრაინის პრეზიდენტმა, ვოლოდიმირ ზელენსკიმ მიუნხენის კონფერენციაზე სიტყვით გამოსვლისას განაცხადა.
უკრაინის პრეზიდენტის თქმით, უკვე ესმის ევროპელი კოლეგებისგან ევროპული არმიის შექმნის იდეა და თავადაც გამოდის ამ არმიის შექმნის შეთავაზებით.
“ევროპას ესაჭიროება საკუთარი ჯარი. ევროპის ჯარი. მე მართლა მიმაჩნია, რომ მოვიდა დრო. უნდა შეიქმნას ევროპის შეიარაღებული ძალები.
უკრაინის ჯარის გარეშე, ევროპული ჯარი რუსეთის შესაჩერებლად საკმარისი არ იქნება. ეს არის რეალობა. ევროპაში მხოლოდ ჩვენს ჯარს აქვს რეალური, თანამედროვე ომის წარმოების გამოცდილება. თუმცა მხოლოდ ჩვენი არმია არ არის საკმარისი. ჩვენ გვჭირდება ის, რისი მოწოდებაც თქვენ შეგიძლიათ. იარაღი. წვრთნები. სანქციები. დაფინანსება. პოლიტიკური ზეწოლა.
გავიმეორებ , ევროპას სჭირდება საკუთარი შეიარაღებული ძალები. ვიცი, რომ ნატო-ს გენერალური მდივანი მარკ რუტე ახლა მისმენს. მარკ, მეგობარო, საქმე არ ეხება ალიანსის ჩანაცვლებას. საქმე ეხება, რომ ევროპის წვლილი ჩვენს პარტნიორობაში გახდეს ამერიკულის თანაბარი”, - განაცხადა ზელენსკიმ.
