საზოგადოებრივი ასამბლეა მედიის უფლებადამცველ ორგანიზაციებს განცხადებით მიმართავს.
საზოგადოებრივი ასამბლეის წარმომადგენლები მოუწოდებენ უფლებადამცველ ორგანიზაციებს, მკაფიო შეფასება მისცენ საქართველოში დამოუკიდებელი და ობიექტური მედიის მიმართ "დე ფაქტო ხელისუფლების მხრიდან განხორციელებულ კანონდარღვევებსა და მიზანმიმართულ დევნას".
"დღეს საქართველოში მედიისა და გამოხატვის თავისუფლება საფრთხეშია - დე ფაქტო ხელისუფლება რეპრესიული კანონების მიღებითა და ზღვარგადასული ძალის გამოყენებით მიზანმიმართულად ცდილობს ჩაახშოს დამოუკიდებელი მედია და მიმდინარე მასობრივი პროტესტი, რომელიც გამოიწვია რეჟიმის მიერ ქვეყნის ევროპული გეზიდან გადახვევამ - სახელმწიფო ინსტიტუციები, მათ შორის სასამართლო იქცა პოლიტიკური დაკვეთის ინსტრუმენტად.
დღეს საქართევლოში 2 ჟურნალისტია პოლიტიკური მოტივით დაკავებული - მათ დაკავებისთანავე პროტესტის უკიდურეს ფორმას, შიმშილობას მიმართეს.
საქართველოს მოქალაქე, ონლაინგამოცემების ბათუმელები / ნეტგაზეთის დამფუძნებელი, მზია ამაღლობელი უკვე 30 დღეზე მეტია შიმშილობს, ხოლო აზერბაიჯანელი ჟურნალისტი, მედიაგამოცემა azel.tv-ს მთავარი რედაქტორი, აფგან სადიგოვი 140 დღეზე მეტია.
ის 2 თებერვლიდან მიმართავს მშრალ შიმშილობას და მისი ჯანმრთელობის მდგომარეობა კრიტიკულია.
თავისუფალი სიტყვისა და ობიექტური ჟურნალისტიკის წინააღმდეგ რეპრესიების სხვადასხვა ფორმა გამოიყენება, მაგალითად უცხოური გამჭვირვალობის კანონის ამოქმედებისას სამ მედია საშუალებას მოუწია საქმიანობის შეჩერება.
ხოლო საზოგადოებრივი მაუწყებლობის წამყვანს, ვასილ ივანოვ ჩიქოვანს შეჩერებული აქვს დროებით საქმიანობა. ჩვენ მოგიწოდებთ მედიის უფლებების დამცველ საერთაშორისო და ადგილობრივ ორგანიზაციებს, მისცეთ მკაფიო შეფასება დე ფაქტო ხელისუფლების მხრიდან განხორციელებული კანონდარღვევას და მიზანმიმართულ დევნას.
გთხოვთ გამოიყენოთ თქვენს ხელთ არსებული ყველა ლეგიტიმური საშუალება პოლიტიკური მოტივით დაკავებული ჟურნალისტების გათავისუფლებისა და აქციაზე დაზარალებული ჟურნალისტების საქმეების გამოძიების მიზნით და ამ გზით გამოხატოთ სოლიდარობა კოლეგების მიმართ", - წერია განცხადებაში.
ფოტო: Euronews
