გერმანიის კანცლერი ოლაფ შოლცი კატეგორიულად ეწინააღმდეგება მიუნხენის უსაფრთხოების კონფერენციაზე აშშ-ის ვიცე-პრეზიდენტის, ჯეი დი ვენსის განცხადებებს.
„მე კატეგორიულად უარვყოფ აშშ-ის ვიცე-პრეზიდენტის ვენსის მიერ მიუნხენის უსაფრთხოების კონფერენციაზე გაკეთებულ განცხადებებს. ნაციონალ-სოციალიზმის გამოცდილებიდან გამომდინარე, გერმანიაში დემოკრატიულ პარტიებს აქვთ საერთო კონსენსუსი: ეს არის დამცავი ბარიერი ულტრამემარჯვენე პარტიების წინააღმდეგ“, - წერს შოლცი X-ზე.
მიუნხენის უსაფრთხოების კონფერენციაზე ჯეი დი ვენსმა სხვა პარტიებსა და „ალტერნატივა გერმანიისთვის“ შორის ურთიერთობასთან დაკავშირებით თქვა, რომ „ბარიერების ადგილი არ არის“. აშშ-ის ვიცე-პრეზიდენტის თქმით, კონფერენციის ორგანიზატორებმა პოპულისტური პარტიების დეპუტატები დაბლოკეს.
