უკრაინა მზადაა სამშვიდობო პირობების მხრივ აშშ-სთან ყველაფერი განიხილოს,მათ შორის ნატო-ში გაწევრიანება. ამის შესახებ უკრაინის პრეზიდენტმა ვოლოდიმირ ზელენსკიმ მიუნხენში ჟურნალისტებთან შეხვედრაზე განაცხადა.
უკრაინის პრეზიდენტმა განაცხადა, რომ უკრაინა არ უყენებს შეერთებულ შტატებს არანაირ პირობებს ტრამპთან შეხვედრისთვის და არ არსებობს არაფერი, რისი განხილვისთვის ის მზად არ არის.
"მე ვუთხარი პრეზიდენტ ტრამპს, რომ მზად ვარ ვისაუბრო ნებისმიერ დროს. არანაირი პირობა. ჩვენ მზად ვართ ვისაუბროთ ყველაფერზე - [სამხედრო] კონტიგენტიდან დაწყებული ნატო-მდე დამთავრებული“, - განაცხადა ზელენსკიმ.
შეკითხვის საპასუხოდ ზელენსკიმ თქვა, რომ აშშ-ს პოზიცია ნატო-ში უკრაინის გაწევრიანების შესახებ ესმის და არ არის დარწმუნებული, რომ ის მომავალში შეიცვლება.
"დღევანდელი ამერიკა და პრეზიდენტი ტრამპი ნატო-ზე სასაუბროდ მზად არ არიან. მათ მიაჩნიათ, რომ უკრაინას არ შეუძლია ნატო-ში იყოს. მათი აზრით, ის, რომ ნატო უკრაინის კონსტიტუციაშია, რუსული ოკუპაციის მთავარ მიზეზს წარმოადგენს". - თქვა ზელენსკიმ.
გარდა ამისა, ზელენსკის თქმით, არ არის გამორიცხული, რომ უკრაინამ ნატო-ში გაწევრიანებისკენ სწრაფვას გადახედოს. მანვე დაამატა, რომ ნატო-ში გაწევრიანების სურვილს არა "სიტყვა", არამედ უსაფრთხოების გარანტიები განაპირობებს.
"გვსურს, რომ ნატო-ში ვიყოთ? დიახ. მაგრამ სიტყვა "ნატო"-ს გამო? [არა], უსაფრთხოების გარანტიების გამო". - თქვა ზელენსკიმ.
ზელენსკიმ თქვა, რომ ნატო-ს წევრობაზე უარის შემთხვევაში, მნიშვნელოვანი იქნება უსაფრთხოების გარანტიების შესრულება და დაცვა,
უკრაინის პრეზიდენტმა აღნიშნა, რომ მშვიდობის მოლაპარაკებების ფარგლებში უკრაინის ტერიტორიული მთლიანობის იურიდიული განსაზღვრების ცვლილება არ განიხილება.
"იურიდიულად ჩვენ არასდროს არ ვაღიარებთ ამ ტერიტორიებს "რუსულად", ან არა რუსულად, არამედ სხვაგვარად [უკრაინულის გარდა]. ეს ნამდვილად წითელი ხაზია, ეს კონსტიტუციაში წერია. ამის გადაწყვეტა მხოლოდ უკრაინელ ერს შეუძლია". - თქვა ზელენსკიმ.
