საქართველოს მეხუთე პრეზიდენტი სალომე ზურაბიშვილი მიუნხენის უსაფრთხოების კონფერენციის ფარგლებში 14 თებერვალს ორმხრივ შეხვედრებს გამართავს. მისი ადმინისტრაციის ცნობით, შეხვედრები გაიმართება ლიეტუვისა და ლატვიის პრეზიდენტებთან.
სალომე ზურაბიშვილი დღესვე შეხვდება ევროპოლის აღმასრულებელ დირექტორს, კეტრინ დე ბოლსაც. ამასთან, დღესვე გაიმართება პანელური დისკუსია ,,საქართველო ყურადღების ცენტრში“, სადაც სალომე ზურაბიშვილი დისკუსიაზე დამსწრეთა შეკითხვებს უპასუხებს და ქვეყანაში არსებულ მდგომარეობასა და გამოწვევებზე ისაუბრებს.
დღეს გერმანიაში მიუნხენის უსაფრთხოების კონფერენცია იხსნება. სამდღიან კონფერენციაზე დაგეგმილია მსოფლიოს 60-მდე ლიდერის შეკრება.
ყოველწლიურ საერთაშორისო ღონისძიებაში ასევე მონაწილეობენ ევროკავშირის ლიდერები.
კონფერენციას გერმანიის პრეზიდენტი ფრანკ-ვალტერ შტაინმაიერი გახსნის. ღონისძიების ფარგლებში გაიმართება მაღალი დონის დისკუსიები საგარეო და უსაფრთხოების გამოწვევებთან დაკავშირებით.
საქართველოდან კონფერენციას მე-5 პრეზიდენტი სალომე ზურაბიშვილი და პარტია “საქართველოსთვის“ ლიდერი, გიორგი გახარია დაესწრებიან. კონფერენციაზე საქართველოს ხელისუფლების წარმომადგენლები არ მიუწვევიათ.
