აშშ-ის ფედერალურმა მოსამართლემ ტრამპის ადმინისტრაციას დაავალა, დროებით გააუქმოს საგარეო დახმარების დაფინანსების შეჩერება. იუწყება Reuters
სასამართლომ გადაწყვეტილება საერთაშორისო დახმარების პროექტებზე მომუშავე სხვადასხვა ორგანიზაციებისა და არაკომერციული ჯგუფების მიერ შეტანილი საჩივრის საფუძველზე მიიღო.
ფედერალურმა მოსამართლემ დონალდ ტრამპის ადმინისტრაციას უბრძანა, აღადგინოს გაყინული საგარეო დახმარება ასობით შესაბამისი კონტრაქტორისთვის, რომლებიც ამტკიცებენ, რომ ადმინისტრაციის მიერ დახმარების 90-დღიანმა გაყინვამ მათზე ნეგატიური გავლენა მოახდინა.
როგორც მოსამართლე აღნიშნავს, დონალდ ტრამპის ადმინისტრაცია აცხადებს, რომ შეაჩერა USAID-ის დახმარების ათასობით პროგრამის დაფინანსება თითოეული მათგანის დეტალური შემოწმებისთვის. თუმცა, მოსამართლის ცნობით, ადმინისტრაციას არ წარუდგენია არანაირი განმარტებები, რატომ იყო საჭირო კონგრესის მიერ დამტკიცებული საგარეო დახმარების სრული შეწყვეტა – რამაც გამოიწვია შოკური ტალღა და თავდაყირა დააყენა კონტრაქტები ათასობით არაკომერციულ ჯგუფთან, ბიზნესთან და სხვებთან – რაციონალური წინაპირობა პროგრამების გადასახედად.
აღნიშნული გადაწყვეტილება პირველია, რომელმაც ტრამპის მიერ საგარეო დახმარების გაყინვის ბრძანება ნაწილობრივ დაბლოკა.
მანამდე, სხვა საქმეზე სასამართლომ ერთი კვირით გაახანგრძლივა თავისი განკარგულება, რომლითაც შეაჩერა დონალდ ტრამპის ადმინისტრაციის გეგმები USAID-ის თანამშრომლების ნაწილის გათავისუფლებასთან დაკავშირებით.
