ევროკავშირის სახელმწიფოებმა და დიდმა ბრიტანეთმა განაცხადეს, რომ უკრაინა და ევროპა უნდა მონაწილეობდნენ ნებისმიერ მოლაპარაკებაში, რომელიც უკრაინას ეხება.
საფრანგეთის, გერმანიის, პოლონეთის, იტალიის, ესპანეთის, დიდი ბრიტანეთისა და უკრაინის საგარეო საქმეთა მინისტრებმა გაავრცელეს ერთობლივი განცხადება, რომელშიც ხაზგასმულია, რომ მზად არიან კიევისადმი მხარდაჭერის გასაძლიერებლად. განცხადებას უერთდება ევროკავშირის უმაღლესი წარმომადგენელი, ევროპული კომისიის ვიცეპრეზიდენტი კაია კალასი.
განცხადებაში აღნიშნულია, რომ ქვეყნების საერთო მიზანი უკრაინის პოზიციების გაძლიერება უნდა იყოს და საჭიროა კიევისთვის უსაფრთხოების ძლიერი გარანტიების მიცემა.
ევროპელი მინისტრებს აქვთ მოლოდინი, რომ შემდგომი გზების განხილვა ამერიკელ მოკავშირეებთან ერთად უნდა მოხდეს და აცხადებენ, რომ საერთო მიზანი უნდა იყოს უკრაინისთვის ძლიერი პოზიციების უზრუნველყოფა. განცხადებაში ასევე ნათქვამია, რომ უკრაინას უნდა ჰქონდეს უსაფრთხოების ძლიერი გარანტიები.
განცხადების თანახმად, უკრაინაში სამართლიანი და მდგრადი მშვიდობის დამყარება აუცილებელი პირობაა ძლიერი ტრანსატლანტიკური უსაფრთხოებისთვის, ევროპის უსაფრთხოება კი საერთო პასუხისმგებლობაა.
