კომპანია თბილისი ენერჯი ცენტრალური გაზსადენის დაზიანებასთან დაკავშირებით განცხადებას ავრცელებს და წერს, რომ გაზმომარაგების აღდგენა ხვალ, დღის პირველი ნაწილიდან ეტაპობრივად დაიწყება.
კომპანიის ცნობით, ცენტრალური გაზსადენი "სავარაუდოდ მესამე პირის მიერ დაზიანდა"
"თბილისი ენერჯი გაცნობებთ, რომ ცენტრალური გაზსადენი სავარაუდოდ "მესამე პირის" მიერ დაზიანდა. ამასთან დაკავშირებით მიმდინარეობს მოკვლევა და დამატებითი დეტალები უმოკლეს დროში გავრცელდება.
დაზიანების მასშტაბიდან გამომდინარე გაზმომარაგების აღდგენა ხვალ დღის პირველ ნახევარში ეტაპობრივად დაიწყება.
თბილისი ენერჯი ბოდიშს გიხდით აბონენტებს შექმნილი დისკომფორტის გამო.
გთხოვთ ყურადღებით იყოთ და არ დატოვოთ გაზის ონკანები ღია მდგომარეობაში" - ნათქვამია კომპანიის მიერ გავრცელებულ განცხადებაში.
ცნობისთვის, კომპანიამ ცოტა ხნის წინ გაავრცელა ინფორმაცია, რომ დაუდგენელი მიზეზით დაზიანდა ცენტრალური გაზსადენი, რომელიც ვაკე-საბურთალოს ამარაგებდა.
