2025 წელს უკრაინაში ომის დასრულება შესაძლებელია, მაგრამ ამისთვის აუცილებელი ზომები უნდა იქნას მიღებული. კერძოდ, აუცილებელია რუსეთის წინააღმდეგ სანქციების გამკაცრება და უსაფრთხოების გარანტიები. ამის შესახებ უკრაინის პრეზიდენტმა ვოლოდიმირ ზელენსკიმ ბრიტანულ ტელეარხ ITV News-თან ინტერვიუში განაცხადა.
"ჩვენ ეს ძალიან გვინდა. და ყოველწლიურად, სიმართლე გითხრათ, ჩვენ ნამდვილად გვინდოდა, რომ ჩვენს დასავლელ პარტნიორებს ჰქონოდათ საკმარისი ძალა, რათა აეძულებინათ პუტინი დაემთავრებინა ომი", - განაცხადა ზელენსკიმ.
ზელენსკიმ ხაზგასმით აღნიშნა, რომ ომის დასრულების ყველა შესაძლებლობა 2025 წელს გაჩნდა. მან დასძინა, რომ აშშ-ის პრეზიდენტ დონალდ ტრამპსაც ეს სურს.
„მიმაჩნია, რომ დღეს ამის ყველა შესაძლებლობა არსებობს. ჩემი აზრით, ტრამპს ომის სწრაფი დასრულება სურს. მოხდება ეს სწრაფად თუ არა, არ ვიცით, მაგრამ ვიცით, რომ ძლიერები უნდა ვიყოთ. ის ძლიერია, მაგრამ ჩვენ უნდა ვიმოქმედოთ მტკიცედ ევროპელებთან ალიანსში“, - აღნიშნა უკრაინის პრეზიდენტმა.
ზელენსკის ასევე მიაჩნია, რომ რუსეთის წინააღმდეგ სანქციებმა მნიშვნელოვანი დარტყმა მიაყენა ქვეყნის ეკონომიკას. თუმცა მოსკოვმა იპოვა მათთან ადაპტაციის გზა.
„რატომ? იმიტომ, რომ ყოველთვის იყო ასეთი „უფსკრული“, როცა საბანკო სანქციებს აწესებენ, მაგრამ არა ყველა ბანკზე, სოფლის მეურნეობაზე, მაგრამ მუშაობს ჩრდილოვანი ფლოტი. ახლა სანქციები შემოიღეს ჩრდილოვანი ფლოტის წინააღმდეგ. მაგრამ ისევ არა ყველა გემზე, არც მთელ ფლოტზე... საუბარია ასობით გემზე, რომლებსაც სანქციები უნდა დაუწესდეთ.
და კაპიტანებზე, ეკიპაჟებზე, ყველა იმ ადამიანზე, ვინც ამას აკეთებს“, - თქვა უკრაინის პრეზიდენტმა. ზელენსკი დარწმუნებულია, რომ რუსეთის წინააღმდეგ სანქციები უფრო მკაცრი უნდა იყოს.
მან ასევე აღნიშნა, რომ უკრაინას სჭირდება უსაფრთხოების გარანტიები უკრაინელი ხალხის დასამშვიდებლად და ხალხის სახლში დასაბრუნებლად. „ჩვენ გვჭირდება ჩვენი ხალხის დაბრუნება, 8 მილიონი ადამიანის“, - დასძინა ზელენსკიმ.
მისი თქმით, უკრაინისთვის მნიშვნელოვანია სამართლიანი მშვიდობა, მაგრამ ახლა საუბარია ომის ცხელი ფაზის შეჩერებაზე. მისივე თქმით, აუცილებელია უკრაინის არმიის მხარდაჭერა, რათა "უკრაინა ხვალ მარტო არ დარჩეს".
