სამაშველო-საძიებო ჯგუფებმა იპოვეს თვითმფრინავის ნარჩენები, რომელიც რადარებიდან ხუთშაბათს გაუჩინარდა.
ტელეარხ CNN-ის ინფორმაციით, ავიაკატასტროფის შედეგად დაიღუპა ბორტზე მყოფი ყველა პირი - 9 მგზავრი და 1 პილოტი.
როგორც იუწყებიან, თვითმფრინავის ნარჩენები ნომის სამხრეთ-აღმოსავლეთით დაახლოებით 40 კილომეტრში აღმოაჩინეს.
ავიაკატასტროფის გამომწვევი მიზეზი ჯერჯერობით უცნობია. მიმდინარეობს კატასტროფის ადგილიდან ცხედრების ამოღების სამუშაოები.
Bering Air-ის თვითმფრინავი ასრულებდა რეისს ქალაქ უნალაკლეეტიდან ქალაქ ნომისკენ.
ბოლო დღეებში ეს არის მესამე დიდი საავიაციო ინციდენტი შეერთებულ შტატებში. 29 იანვარს, აშშ-ის დედაქალაქ ვაშინგტონთან, სამგზავრო თვითმფრინავი და სამხედრო ვერტმფრენი ერთმანეთს შეეჯახა, რის შედეგადაც 67 ადამიანი დაიღუპა.
ორი დღის შემდეგ, 31 იანვარს, ფილადელფიაში სამედიცინო სატრანსპორტო თვითმფრინავი ჩამოვარდა, რის შედეგადაც ბორტზე მყოფი ექვსი ადამიანი დაიღუპა, ერთი კი ხმელეთზე.
