უკრაინის პრეზიდენტის ვოლოდიმირ ზელენსკის განცხადებით, უკრაინას არ სურს თავისი სასარგებლო წიაღისეულის მარაგები, მათ შორის იშვიათი ლითონები, დასავლეთს „აჩუქოს".
მისივე თქმით, კიევი თავის დასავლელ პარტნიორებს სთავაზობს ურთიერთსასარგებლო თანამშრომლობას, სადაც აშშ პრიორიტეტულ წვდომას მიიღებს საბადოებზე. ამის შესახებ ზელენსკიმ Reutes-თან ინტერვიუში ისაუბრა.
უკრაინის პრეზიდენტის თქმით, ქვეყნის იშვიათი ლითონების მარაგების დაახლოებით ნახევარი მდებარეობს რუსეთის მიერ კონტროლირებად ტერიტორიაზე და რუსეთის ფედერაციამ შესაძლოა ის ჩრდილოეთ კორეას გადასცეს.
ზელენსკიმ აღნიშნა, რომ უკრაინას სჭირდება უსაფრთხოების გარანტიები მისი მოკავშირეებისგან, როგორც ომის ნებისმიერი მოგვარების ნაწილი და ღიაა შეერთებულ შტატებთან „გარიგების“ დასადებად.
„ჩვენ უნდა შევაჩეროთ პუტინი და დავიცვათ ის, რაც გვაქვს - ძალიან მდიდარი დნეპერის რეგიონი, ცენტრალური უკრაინა“, - თქვა მან.
ზელენსკიმ ხაზგასმით აღნიშნა, რომ კიევი არ სთავაზობს თავისი რესურსების „მიცემას“ შეერთებული შტატებისთვის, არამედ ორმხრივად მომგებიანი პარტნიორობის ფორმირებას მათი ერთობლივი განვითარებისთვის.
„ამერიკელები ყველაზე მეტად დაგვეხმარნენ, ამიტომ ამერიკელებმა ყველაზე მეტი უნდა გამოიმუშაონ. მათ უნდა ჰქონდეთ ეს პრიორიტეტი და მიიღებენ მას. მსურს ამაზე საუბარი პრეზიდენტ ტრამპთან“, - აღნიშნა უკრაინის პრეზიდენტმა.
