პარლამენტმა შეკრება-მანიფესტაციების წესებისა და ადმინისტრაციული პასუხისმგებლობის გამკაცრებასთან დაკავშირებული კანონის პროექტი მეორე მოსმენით, დათქმებით რამდენიმე მუხლის გარეშე მიიღო.
კანონპროექტის კენჭისყრის დაწყებამდე არჩილ გორდულაძემ განაცხადა, რომ საჭიროა დამატებითი კონსულტაციების გამართვა და პაპუაშვილს შესთავაზა, კანონპროექტებს ცალ-ცალკე, კონკრეტული დათქმებით ეყაროს კენჭი.
"იმისთვის, რომ დამატებითი კონსულტაციები გავმართოთ, ისევ და ისევ ადამიანის უფლებათა ჭრილში რომ შევხედოთ საკითხს და მეტი გარანტიებისთვის, ასევე, რიგი პროცედურული საკითხების უკეთ გააზრებისთვის, გთავაზობთ, ადმინისტრაციულ სამართალდარღვევათა კოდექსის პირველი მუხლის მე-8, მე-10, მე-11 და მე-12 ნაწილების კენჭისყრა გადავდოთ მესამე მოსმენის ფორმატში, როდესაც გვექნება განხილვა, მაშინ განვიხილოთ", - განაცხადა მან.
ცნობისთვის, ადმინისტრაციულ სამართალდარღვევათა კოდექსში ცვლილებებს პარლამენტი დაჩქარებული წესით იხილავს. მისი დამტკიცება მესამე მოსმენით დღესვე იგეგმება.
