5 თებერვალს შეერთებული შტატების კონგრესის ვებგვერდზე გამოქვეყნდა "ქართული კოშმარის არაღიარების აქტის" პროექტი, რომელიც რესპუბლიკელმა კონგრესმენმა ჯო უილსონმა 9 იანვარს წარადგინა.
ამ დროისთვის, აქტის პროექტს კიდევ 1 წარმდგენი (ჯო უილსონი) და 5 თანაწარმდგენი კონგრესმენი ჰყავს - რესპუბლიკელი კონგრესმენები მაიკლ ტერნერი, მაიკლე ლოულერი და დემოკრატი კონგრესმენები სტივ კოენი, ლოიდ დოგეტი, ემანუელ კლივერი.
კონგრესში წარდგენის შემდგომ, აქტის პროექტი თავდაპირველად წარმომადგენელთა პალატის საგარეო საქმეთა კომიტეტმა და იურიდიულმა კომიტეტმა უნდა განიხილონ.
აქტის პროექტის თანახმად, აიკრძალება "ბიძინა ივანიშვილის, ან მისი ლიდერობით მოქმედი საქართველოს ნებისმიერი მთავრობის აღიარება შეერთებული შტატების მხრიდან".
აქტის დამტკიცების შემთხვევაში, შეერთებული შტატების პოლიტიკა იქნება, "ქართველი ხალხის წინააღმდეგ ივანიშვილის რეჟიმის მიმდინარე დანაშაულების გამო, არ აღიაროს და არ მოახდინოს ურთიერთობის ნორმალიზება საქართველოს ნებისმიერ მთავრობასთან, რომელიც ბიძინა ივანიშვილის, ან მასთან დაკავშირებული პირების მიერ იქნება მართული".
ამავდროულად, როგორც პროექტში ვკითხულობთ, აშშ უნდა შეეწინააღმდეგოს "სხვა მთავრობათა მიერ საქართველოს იმ მთავრობის აღიარებას და მასთან ურთიერთობის ნორმალიზებას, რომელსიც ბიძინა ივანიშვილის, ან მასთან დაკავშირებული პირების მიერ იქნება მართული, მათ შორის ძირითადი და მეორადი სანქციების გამოყენებით".
როექტის დამტკიცების შემთხვევაში, აშშ გამოიყენებს უფლებათა სრულ სპექტრს, მათ შორის მაგნიტსკის გლობალურ აქტს, რათა შეაკავოს "რუსეთის, ირანისა და ჩინეთის კომუნისტური პარტიის ინტერესების გათვალისწინებით, საქართველოს მიერ კორუფციული აქტივობა ან საგარეო გავლენის ოპერაციები".
აქტის პროექტის თანახმად, აშშ-ის ფედერალურ ოფიციალურ პირებსა და მოხელეებს აეკრძალებათ ნებისმიერი სახის ქმედების განხორციელება ან ფედერალური სახსრების გამოყოფა, რაც დაკავშირებული იქნება ბიძინა ივანიშვილის ან მასთან დაკავშირებული პირის მიერ მართული საქართველოს მთავრობის აღიარებისთვის ან აღიარების მინიშნებისთვის.
ამასთან, აქტის პროექტის გათვალისწინებით, აშშ-მა საქართველოს ერთადერთ ლეგიტიმურ ლიდერად უნდა აღიაროს "2024 წლის 26 ოქტომბრის თაღლითურ არჩევნებამდე მოქმედი პრეზიდენტი სალომე ზურაბიშვილი".
აქტის პროექტში აღნიშნულია, რომ "საქართველოს კონსტიტუციის აღდგენის შემთხვევაში, რისი დასტურიც თავისუფალი და სამართლიანი არჩევნების ჩატარება იქნება, აშშ-ის პრეზიდენტს ამ აქტის გაუქმებულად გამოცხადება შეუძლია".
