ჩვენი მიზანი საგარეო დახმარების გაუქმება არ არის, არის რაღაცები, რასაც USAID-ის მეშვეობით ვაკეთებთ, რაც უნდა გავაგრძელოთ, - ამის შესახებ აშშ-ის სახელმწიფო მდივანი მარკო რუბიომ Fox News-თან ინტერვიუში განაცხადა.
მისი თქმით, USAID-ში გაივლიან იმავე პროცესს, რასაც სახელმწიფო დეპარტამენტში.
"ჩვენ გავივლით იმავე პროცესს USAID-ში, რასაც ახლა სახელმწიფო დეპარტამენტში გავდივართ. ვფიქრობ, არის რაღაც... მიზანი საგარეო დახმარების გაუქმება არ არის. არის რაღაცები, რასაც USAID-ის მეშვეობით ვაკეთებთ, რაც უნდა გავაგრძელოთ, ამას აზრი აქვს და მოგვიწევს გადავწყვიტოთ, ამის გაკეთება სახელმწიფო დეპარტამენტის გავლით ჯობს, თუ უკეთესია - რეფორმირებული USAID-ით ეს არის პროცესი, რომელზეც ჩვენ ვმუშაობთ“, - განაცხადა რუბიომ..
როგორც ცნობილია, აშშ-ის სახელმწიფო მდივანი მარკო რუბიო აშშ-ის საერთაშორისო განვითარების სააგენტოს (USAID) ადმინისტრატორის მოვალეობის შემსრულებლად დაინიშნა.
ამ რანგში მან უნდა ჩაატაროს სააგენტოს საქმიანობის აუდიტი და მოემზადოს მისი შესაძლო რეორგანიზაციისთვის.
„USAID-ის საქმიანობის შეფასებით და იმის უზრუნველსაყოფად, რომ ის შეესაბამებოდეს პროგრამას „ამერიკა უპირველეს ყოვლისა“ და სახელმწიფო დეპარტამენტის ძალისხმევას, ჩვენ გავაგრძელებთ ამერიკელი ხალხის ინტერესების დაცვას და უზრუნველვყოფთ, რომ მათი გადასახადები ტყუილად არ იხარჯებოდეს“, - ნათქვამია სახელმწიფო დეპარტამენტის განცხადებაში.
