უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთის პრეზიდენტს ვლადიმირ პუტინს უკრაინასთან პირდაპირი მოლაპარაკებების ეშინია. ამის შესახებ ზელენსკიმ Associated Press-თან ინტერვიუში ისაუბრა.
„მას [პუტინს] აუცილებლად შეეშინდება ჩვენთან პირდაპირი მოლაპარაკების. მე ვფიქრობ, რომ მისთვის ეს მისი მარცხია, მისი სისუსტეა.
მას ამის შეეშინდება, ამიტომ ყველაფერს გააკეთებს იმისთვის, რომ აჩვენოს ძველი ნარატივები, რომ ეს არის ომი დასავლეთსა და რუსეთს შორის. ის ვერ აღიარებს, რომ რეალურად აგებს უკრაინასთან. მან ვერ დაამარცხა უკრაინა, რაც იმას ნიშნავს, რომ წაგებულია.
მაგრამ მას არ შეუძლია ამის აღიარება, რადგან აი ასეთი ქვეყანაა რუსეთი რუკაზე და ასეთი ქვეყანაა უკრაინა. ამიტომ ის ამბობს: „მე მინდა ტრამპთან საუბარი, მე მზად ვარ ამერიკასთან ვისაუბრო“, ის ყოველთვის ასე აკეთებდა“, - განაცხადა ზელენსკიმ.
ზელენსკი დარწმუნებულია, რომ პუტინი "ჩაშლის" მოლაპარაკებებს.
ის ჯერ იტყვის: ეს არის ომი რუსეთსა და დასავლეთს შორის, ამიტომ ველაპარაკები დასავლეთს. როდესაც პრეზიდენტი ტრამპი მას ეუბნება, რომ უკრაინა, ჩვენ ყველა ერთად უნდა დავსხდეთ მოლაპარაკების მაგიდასთან, ის კვლავ ილაპარაკებს არალეგიტიმურობაზე.
ის მოიფიქრებს მიზეზებს, რათა თავიდან აიცილოს უკრაინაში ომის დასრულების შესაძლებლობა მოლაპარაკების მაგიდასთან“, - განაცხადა უკრაინის პრეზიდენტმა.
ზელენსკის თქმით, პუტინი თავის თავში ებრძვის ამერიკას და ფიქრობს, რომ ის ამარცხებს ამერიკას.
უკრაინის პრეზიდენტმა ხაზგასმით აღნიშნა, რომ აშშ-რუსეთის მოლაპარაკებები უკრაინის ომზე უკრაინის მონაწილეობის გარეშე "არასწორია".
„თუ ჩვენ ტრამპთან ერთად განვიხილავთ ჩვენს სამოქმედო გეგმას, ჩვენ მივხვდებით, როგორ შეიძლება დასრულდეს ეს ომი, ამის შემდეგ, ალბათ, მას შეუძლია ისაუბროს, თუ მას სურს, რუსებთან და ეს ნორმალურია“, - დასძინა ზელენსკიმ.
