თვითმფრინავი, რომელიც ფილადელფიაში ჩამოვარდა, სამედიცინო დანიშნულების იყო. ამის შესახებ ინფორმაციას თვითმფრიავის მფლობელი კომპანიის პრესსამსახური ავრცელებს. დაღუპულია 6 ადამიანი.

„სასწრაფო დახმარების თვითმფრინავი Jet Rescue ჩამოვარდა. ბორტზე იმყოფებოდა ეკიპაჟის ოთხი წევრი და ორი მგზავრი (პაციენტი და თანმხლები პირი)“, - ნათქვამია განცხადებაში.

კომპანიაში განმარტავენ, რომ ბორტზე მყოფთა ვინაობას არ დაასახელებენ, ვიდრე მათი ოჯახის ყველა წევრი არ იქნება ინფორმირებული მომხდარის შესახებ.

ავიაკატასტროფა ჩრდილო-აღმოსავლეთ ფილადელფიაში 31 იანვარს, რუზველტის ბულვარისა და კოტმენის გამზირზე მოხდა. თვითმფრინავის ჩამოვარდნის მიზეზი ჯერჯერობით უცნობია.

ფედერალური საავიაციო ადმინისტრაციის (FAA) ცნობით, თვითმფრინავი მისურის სპრინგფილდ-ბრანსონის აეროპორტისკენ მიემართებოდა.

Jet Rescue Air Ambulance-ს ცნობით, ბორტზე ექვსი ადამიანი იმყოფებოდა, მათ შორის ერთი ბავშვი.

პენსილვანიის გუბერნატორმა ჯოშ შაპირომ განაცხადა, რომ  ის მცირე ზომის კერძო თვითმფრინავი იყო.

მისი თქმით, მაშველები უზრუნველყოფილნი არიან ყველა საჭირო რესურსით.

ფილადელფიის მერის განცხადებით, ავიაკატასტროფის შედეგად დაზიანდა და დაიწვა რამდენიმე სახლი და მანქანა. ადგილზე არიან დაშავებულებიც. მათი რაოდენობა დგიინდება

აშშ-ის პრეზიდენტმა დონალდ ტრამპმა ავიაკატასტროფის გამო მწუხარება გამოთქვა.