თბილისის მერიის განცხადებით, 16 წლის მოზარდი რამდენიმე დღის წინ "კერძო ტერიტორიაზე არსებულ შენობა-ნაგებობაში" უბედური შემთხვევის შედეგად გარდაიცვალა, ხოლო გავრცელებული ინფორმაცია, თითქოს შემთხვევა რიყის პარკში მოხდა, არ შეესაბამება სიმართლეს.
"გვსურს, გამოვეხმაუროთ კონკრეტული მედიასაშუალების მიერ გავრცელებულ ცრუ ინფორმაციას, თითქოს, 16 წლის მოზარდი, რომელიც რამდენიმე დღის წინ უბედური შემთხვევის შედეგად გარდაიცვალა, რიყის პარკში მდებარე ღია თხრილში ჩავარდა.
გავრცელებული ინფორმაცია არის სრული სიცრუე და ცილისწამება. სამწუხაროდ, ტრაგედია დატრიალდა კერძო ტერიტორიაზე არსებულ შენობა-ნაგებობაში.
კიდევ ერთხელ ვიმეორებთ, რომ შემთხვევა მოხდა ერთ-ერთ კერძო საკუთრებაში.
სამწუხაროა, რომ მედია მსგავს ტრაგედიას იყენებს უწყების დისკრედიტაციისთვის. უბედური შემთხვევაზე დაწყებულია გამოძიება. მოვუწოდებთ მედიის წარმომადგენლებს, პატივი სცენ საკუთარ პროფესიას და საზოგადოებას მიაწოდონ მხოლოდ და მხოლოდ გადამოწმებული ინფორმაცია.
თბილისის მერია ღრმა მწუხარებას გამოთქვამს მოზარდის გარდაცვალების გამო და სამძიმარს უცხადებს მის ოჯახს". - წერს მერია.
"ტვ პირველის" ცნობით, თბილისში, რიყის პარკში მე-8 კლასელი მოზარდი ღია თხრილში ჩავარდა და დაიღუპა. არხის ინფორმაციით, ადგილზე არც გამაფრთხილებელი ნიშნები იყო და არც უსაფრთხოების ზომები იყო დაცული.
