უკრაინის პრეზიდენტმა ვოლოდიმირ ზელენსკიმ განაცხადა, რომ ომის დასრულებაზე პირველი მოლაპარაკებები გაიმართება ამერიკის არჩეულ პრეზიდენტ დონალდ ტრამპთან მისი ინაუგურაციის შემდეგ, შემდეგ კი რუსეთის ლიდერთან ვლადიმირ პუტინთან, თუ ტრამპი შესთავაზებს „უსაფრთხოების ძლიერ გარანტიებს უკრაინისთვის“.
ამის შესახებ ზელენსკიმ ლექს ფრიდმანთან ინტერვიუში ისაუბრა.
„ვფიქრობ, 25 იანვარს ან სხვა დღეს, ჩვენ დავსხდებით, პირველ რიგში, ტრამპთან, ჩვენ შევეთანხმდებით მასთან, როგორ შევაჩეროთ ომი და პუტინი“, - განაცხადა ზელენსკიმ.
უკრაინის პრეზიდენტმა ასევე ხაზგასმით აღნიშნა, რომ ევროპასაც აქვს ხმა, რადგან ევროპა უყურებს უკრაინას და ტრამპს.
ამავდროულად, უკრაინის პრეზიდენტი ვარაუდობს, რომ ტრამპი შეიძლება აღმოჩნდეს რთულ პოლიტიკურ სიტუაციაში, თუ ის მიაღწევს ცეცხლის შეწყვეტას უკრაინისთვის უსაფრთხოების ადეკვატური გარანტიების გარეშე.
„ჩვენ უნდა ვიყოთ ძლიერის პოზიციაში, კი არ უნდა ვისაუბროთ, არამედ უნდა დავასრულოთ ომი. დიახ, ეს შესაძლებელია დიალოგის გზით. ჩვენ ამის წინააღმდეგი არ ვართ. უბრალოდ, საჭიროა, ვიყოთ ძლიერის პოზიციაში, რომ მეორე ადამიანს მოუნდეს ეს. ჩემი აზრით, მიამიტობაა, იფიქრო, თითქოს პუტინს სურს ომის დასრულება. არის რაღაცები, რაც გვჭირდება. ჩემი აზრით, პრეზიდენტ ტრამპს აქვს არა მხოლოდ ნება, არამედ ყველა შესაძლებლობა, რომ არა მხოლოდ ილაპარაკოს. რეალურად, მე მისი იმედი მაქვს და ჩემი აზრით, ჩვენს ხალხსაც აქვს მათი იმედი. ტრამპს აქვს საკმარისი ძალაუფლება, რომ მოახდინოს ზეწოლა პუტინზე. ზეწოლა არა იმისთვის, რომ მოანდომოს მას ომის დასრულება, რადგან პუტინს ეს არ მოუნდება, არამედ მოახდინოს ზეწოლა, რომ მან ომი დაასრულოს. ამაშია განსხვავება. არ დაეყრდნოთ პუტინის ნებას და სურვილს, დაასრულოს ომი. ასეთ ნებას მისგან ვერ იხილავთ“, – განაცხადა ვოლოდიმირ ზელენსკიმ.
ზელენსკიმ ხაზგასმით აღნიშნა, თუ ამერიკელი ლიდერი უკრაინას უსაფრთხოების ძლიერ გარანტიებს შესთავაზებს, ამის შემდეგ შესაძლოა რუსეთთან საუბარი შედგეს.
„რა მოხდება, თუ ჩვენ ცეცხლის შეწყვეტას მოვახერხებთ ისე, რომ გაუგებარი დარჩება, რა იქნება უკრაინის უსაფრთხოების გარანტიებთან დაკავშირებით? მაშინ რა ვუთხრა მილიონობით ბავშვს ოკუპირებულ ტერიტორიებზე? რა უნდა ვუთხრა მათ? რა? ჰეი, თქვენ ყველა, ნახვამდის. და იქ დაკრძალული ათიათასობით ადამიანი, ისინი დარჩნენ იქ, ეს არის, რაც გვინდა? მზად ვართ, ვაპატიოთ მათ ეს? ჩვენ, სულ მცირე, უნდა გადავდგათ პირველი ნაბიჯი. თუ ეს არის ცეცხლის შეწყვეტა, უნდა ვიცოდეთ, რომ არსებობს უსაფრთხოების გარანტია უკრაინის იმ ნაწილისთვის, რომელიც ჩვენს კონტროლქვეშაა. ეს გვჭირდება, რომ პუტინი არ დაბრუნდეს. ეს ძალიან მნიშვნელოვანია.
როგორც კი ტრამპი მოახერხებს, მაგალითად, ცეცხლის შეწყვეტის შეთანხმების მიღწევას უკრაინისთვის სერიოზული უსაფრთხოების გარანტიების გარეშე, ის გზას გაუხსნის პუტინს. არა იმიტომ, რომ ტრამპს ეს სურს. არა, მას არ სურს ეს. მე მჯერა, რასაც ის ამბობს, მაგრამ ის მისცემს პუტინს შესაძლებლობას, რადგან პუტინის თავში, მას სურს, რომ მე ვიბრძოლო ტრამპთან. ამაში აბსოლუტურად დარწმუნებული ვარ. აი რატომ გითხარით, ნუ დაელოდებით, რომ პუტინს მოუნდება ომის შეჩერება. ზეწოლა მოახდინეთ მასზე ისე, რომ ის იძულებული იყოს, შეაჩეროს ომი“, – განაცხადა ვოლოდიმირ ზელენსკიმ.
ამავდროულად, უკრაინის პრეზიდენტი ვარაუდობს, რომ ტრამპი შეიძლება აღმოჩნდეს რთულ პოლიტიკურ სიტუაციაში, თუ ის მიაღწევს ცეცხლის შეწყვეტას უკრაინისთვის უსაფრთხოების ადეკვატური გარანტიების გარეშე.
