ოსმა სეპარატისტებმა ე. წ. სახელმწიფო საზღვრის დარღვევის ბრალდებით საქართველოს ექვსი მოქალაქე დააკავეს. ე. წ. სამხრეთ ოსეთის ბეჭდვისა და ინფორმაციის კომიტეტის ინფორმაციით, 14-იდან 18 იანვრის ჩათვლით პერიოდში ე. წ. სახელმწიფო საზღვრის უკანონოდ გადაკვეთის მცდელობის ფაქტზე 10 კაცია დაკავებული, მათ შორის საქართველოს ექვსი მოქალაქეა.
"დადგენილი ნორმების შესაბამისად, ყველა დაკავებული სამხრეთ ოსეთის უშიშროების სასაზღვრო სამსახურს გადაეცა შემდგომი განხილვისთვის. მოგვიანებით კი ცხინვალის რაიონულმა სასამართლომ მიიღო გადაწყვეტილება ორი მოქალაქის დაჯარიმების შესახებ, ორს გაფრთხილება მიეცა, საქართველოს ექვს მოქალაქეს კი სამხრეთ ოსეთიდან გააძევებენ", _ ნათქვამია გავრცელებულ ინფორმაციაში და იქვე აღნიშნულია, რომ საქართველოს დაკავებულ მოქალაქეებს _ ჯემალ იარდალაშვილს, კახი სამხარაძეს, რამაზ თოკაძეს, ილია სალამაშვილს, თამაზ ხარაზიშვილს და სერგო აბასაძეს _ დაკავების მომენტში პირადობის დამადასტურებელი დოკუმენტები არ გააჩნდათ.
"დადგენილი პროცედურის თანახმად, სამხრეთ ოსეთის უშიშროების სამსახურმა საქართველოს შს სამინისტროს გაუგზავნა მოთხოვნა, წინადადებით, წარმოადგინონ დოკუმენტები, რომლებიც დაკავებულების ვინაობასა და მოქალაქეობას დაადასტურებს. საქართველოდან პასუხი არ არის. ამის გამო მანამ ვიდრე დაკავებული ადამიანების ვინაობა და მოქალაქეობა არ დადასტურდება, ისინი პატიმრობაში დარჩებიან", _ იუწყება ოსური მხარე.
