საქართველოს საპატრიარქოს საზოგადოებასთან ურთიერთობას განცხადებას ავრცელებს და დეზინფორმაციას უწოდებს გავრცელებულ ინფორმაციას, თითქოს ქაშუეთის ეკლესიის კარის გაღებისთვის, ტაძრის წინამძღვარს მეუფე შიომ შენიშვნა მისცა.
საპატრიარქოს განცხადებით, ამჟამად ქაშუეთი, როგორც 29-30 ნოემბერს, ღიაა თითოეული ადამიანისთვის.
"სოციალურ ქსელში ვრცელდება მორიგი დეზინფორმაცია, რომელსაც ამჯერად გვერდი "მსოფლიო საეკლესიო სიახლენი" უზიარებს საზოგადოებას. მათი თქმით, საპატრიარქო ტახტის მოსაყდრის, სენაკისა და ჩხოროწყუს მიტროპოლიტი შიოს დავალებით, "ქაშუეთის ტაძრის მღვდელს ეკლესიის გაღების გამო შენიშვნა მისცეს".
ერთმნიშვნელოვნად ვაცხადებთ, რომ აღნიშნული ინფორმაცია არის მტკნარი სიცრუე და ქვეყნისთვის ესოდენ დაძაბულ ვითარებაში ემსახურება მხოლოდ და მხოლოდ საზოგადოების ორად გახლეჩას, შუღლის გაღვივებას და ეკლესიის დისკრედიტაციას.
სამწუხაროდ, ეს არ არის პირველი შემთხვევა. გვერდი "მსოფლიო საეკლესიო სიახლენი" წარსულშიც მრავალგზის უზიარებდა საზოგადოებას მსგავს ცრუ ინფორმაციას, ამ გვერდის მესვეურნი განსაკუთრებით გაწაფულნი არიან საქართველოს მართლმადიდებელი ეკლესიის სასულიერო პირების, მათ შორის, მიტროპოლიტ შიოს შესახებ ცილისწამების გავრცელებაში.
კიდევ ერთხელ ხაზგასმით აღვნიშნავთ, რომ ამჟამად ქაშუეთის ტაძარი, ისევე როგორც 29 და 30 ნოემბერს, ღიაა თითოეული ადამიანისთვის, იქ იმყოფებიან სასულიერო პირები და საჭიროების შემთხვევაში ნებისმიერ დროს დაეხმარებიან მოქალაქეებს" - წერია განცხადებაში.
