დედოფლისწყაროს რაიონში, ე.წ. შირაქის დასახლებაში მცხოვრებ 10 ოჯახს 20 წელია ელექტროენერგია არ მიეწოდება. ადგილობრივებმა რაიონის ხელისუფლებას დახმარებისთვის არაერთხელ მიმართეს, თუმცა გამგებელმა მათ უთხრა, რომ „დასახლებიდან მათი გასახლება უფრო ადვილია, ვიდრე იქ ელექტროენერგიის მიყვანა".
დასახლებას არც სასმელად ვარგისი წყალი აქვს. წყალს ბაყაყები, ხვლიკები და ჭიები მოჰყვება.
მოზარდები შირაქის დასახლებაში მხოლოდ შაბათ - კვირას ან არდადეგების დროს არიან. ყველაზე ახლოს მდებარე სკოლა 8 კილომეტრშია, სასკოლო ავტობუსი კი არ დადის, რის გამოც მშობლებს ბავშვები ნათესავებთან ჰყავთ გახიზნული.
შირაქის დასახლებაში არსებულ პრობლემებთან დაკავშირებით დედოფლისწყაროს მუნიციპალიტეტის გამგებელმა ნიკოლოზ შანშიაშვილმა კომენტარი არ გააკეთა. კომენტარის გაკეთებაზე უარი თქვა საკრებულოს თავმჯდომარემ ლევან ბაღაშვილმაც, თუმცა ჩვენთან საუბარში განაცხადა, რომ შირაქის დასახლებაში მდებარე შენობებში ადამიანები წლებია უკანონოდ არიან შეჭრილები. მისივე თქმით, 2011 წლის ადგილობრივ ბიუჯეტში შირაქის დასახლება გათვალისწინებული საერთოდ არ არის.
