ნებისმიერ ტერიტორიაზე, სადაც არ არის ინსტიტუციები და არის საოკუპაციო მმართველობა, სტაბილურობა შეუძლებელია, – ამის შესახებ საქართველოს პარლამენტის თავმჯდომარემ, შალვა პაპუაშვილმა ოკუპირებულ აფხაზეთში დღეს განვითარებულ მოვლენებზე საუბრისას განაცხადა.
„უპირველეს ყოვლისა, ეს არის შედეგი იმისა, რომ იქ არის საოკუპაციო მმართველობა. ნებისმიერ ტერიტორიაზე, სადაც არ არის ინსტიტუციები და არის საოკუპაციო მმართველობა, სტაბილურობა შეუძლებელია. ამიტომაც ვამბობთ ჩვენც, რომ ჩვენს საერთო ინტერესშია, ჩვენი აფხაზი თანამოქალაქეების ინტერესშია, რომ ერთიან საქართველოს ფარგლებში განვითარდეს მთლიანად ჩვენი ქვეყანა. მათ შორის აფხაზეთი და აფხაზეთის მოქალაქეების კეთილდღეობაც მხოლოდ ასე განვითარდება. ნებისმიერი ასეთი ნაცრისფერი ზონები, რომელიც საოკუპაციო რეჟიმის წყალობით იქმნება ხოლმე, საქართველოში იქნება თუ სხვაგან, ყოველთვის არის წყარო დესტაბილიზაციის, ვინაიდან ეს არის არაფუნქციონირებადი ინსტიტუციების მქონდე ტერიტორია“, – განაცხადა პაპუაშვილმა.
რაც შეეხება ოკუპირებულ აფხაზეთში განვითარებული მოვლენების ანექსიის მცდელობად შეფასებას, როგორც პაპუაშვილმა აღნიშნა, ამას ანექსიის მცდელობას ვერ დაარქმევს.
„ანექსიის მცდელობას მე ვერ დავარქმევდი. ზოგადად, ამაზე ჩვენ ამდენი ხანია, ვსაუბრობთ, რომ ეს რისკები არის, როცა ჩვენ ვხედავდით ანექსიის პოლიტიკაზე გადასვლას სხვა ქვეყნებთან დაკავშირებით“, – აღნიშნა პაპუაშვილმა.
დღეს, ოკუპირებულ აფხაზეთში ე.წ. პარლამენტის შენობასთან შეკრებილი აქციის მონაწილეები, რომლებიც „კანონპროექტის რატიფიკაციას“ ეწინააღმდეგებიან, ე.წ. პარლამენტის შენობაში შეიჭრნენ. ამასთან, ცნობილი გახდა, რომ ოკუპირებული აფხაზეთის ე.წ. პრეზიდენტის ადმინისტრაცია ამზადებს დოკუმენტს ე.წ. პარლამენტიდან რუსეთთან „საინვესტიციო ხელშეკრულების“ ე.წ. კანონპროექტის გატანის შესახებ.
