რუსეთი ოფიციალურ თბილისს ოკუპირებული აფხაზეთისა და ცხინვალის "საზღვრების" დელიმიტაციისა და დემარკაციისკენ მოუწოდებს - ამის შესახებ განცხადებას რუსეთის საგარეო საქმეთა სამინისტრო ავრცელებს.
აღნიშნულთან დაკავშირებით რუსულმა დელეგაციამ ჟენევის საერთაშორისო დუსკუსიების 62-ე რაუნდზე ისაუბრა, რომელიც 5-6 ნოემბერს გაიმართა. შეხვედრას საქართველოს, რუსეთის, აშშ-ს, ეუთოს, გაეროს, ევროკავშირისა და ოკუპირებული ტერიტორიების მარიონეტული რეჟიმების წარმომადგენლები ესწრებოდნენ. რუსულ დელეგაციას რუსეთის საგარეო საქმეთა მინისტრის მოადგილე, მიხაილ გალუზინი ხელმძღვანელობდა.
რუსეთის საგარეო საქმეთა სამინისტროს განცხადებით, შეხვედრაზე რუსულმა დელეგაციამ თქვა, რომ საქართველოს მხრიდან "შემრიგებლური" სიგნალები "პრაქტიკულ განზომილებაში" უნდა გადაითარგმნოს და საჭიროა, რომ ოკუპირებული აფხაზეთისა და ცხინვალის მარიონეტულ რეჟიმებთან საზღვრის დელიმიტაციისა და დემარკაციის პროცესი დაიწყოს.
"რუსულმა მხარემ ხაზი გაუსვა თბილისიდან მომავალი შემრიგებლური სიგნალების პრაქტიკულ განზომილებაში გადათარგმნის, მათი კონკრეტულ ნაბიჯებად გამყარებისა და განვითარების მნიშვნელობას, რაც, მათ შორის, მოიცავს, უპირველეს ყოვლისა, საქართველოს მხრიდან აფხაზეთის რესპუბლიკისა და სამხრეთ ოსეთის რესპუბლიკის წინააღმდეგ ძალის გამოუყენებლობის იურიდიული გარანტიების თავის თავზე აღებას და ასევე საქართველო-აფხაზეთისა და საქართველო-სამხრეთ ოსეთის სახელმწიფოებრივი საზღვრების დელიმიტაციის პროცესის დაწყებას, მათი შემდგომი დემარკაციით". - წერია განცხადებაში.
