საფრანგეთის პოლიციამ საკურორტო ქალაქ ლა-გრანდ-მოტში სინაგოგის დაწვის მცდელობისთვის მამაკაცი და მისი ორი შესაძლო თანამზრახველი დააკავა.
ამის შესახებ სოციალურ ქსელ X-ზე საფრანგეთის შინაგან საქმეთა მინისტრი ჟერალდ დარმანინმი წერს.
ეჭვმიტანილი პოლიციამ დანაშაულის ადგილიდან 40 კილომეტრში მდებარე ქალაქ ნიმაში იპოვა.
შეიარაღებულმა კაცმა შენობაში მიმალვა სცადა და პოლიციას ცეცხლი გაუხსნა.
ის საპასუხო ცეცხლის შედეგად დაიჭრა. სამართალდამცველებმა კაცი საავადმყოფოში გადაიყვანეს, მის სიცოცხლეს საფრთხე არ ემუქრება.
სინაგოგაში ცეცხლის გაჩენის მცდელობისას კაცმა, რომელსაც გამომძიებლების თქმით, პალესტინის დროშა და იარაღი ეჭირა, ცეცხლი წაუკიდა შენობის კარს, ასევე იქვე გაჩერებულ ორ ავტომობილს.
ხანძრის ჩაქრობის მცდელობისას, პოლიციელი დაშავდა - მან დამწვრობა მიიღო, როდესაც ერთ-ერთ მანქანაში გაზის ბალონი აფეთქდა.
ინციდენტის დროს სინაგოგაში ხუთი ადამიანი იმყოფებოდა, მაგრამ ისინი არ დაშავებულან. დამნაშავე შემთხვევის ადგილიდან პოლიციის მისვლამდე მიიმალა.
საფრანგეთის პრეზიდენტმა ემანუელ მაკრონმა მომხდარს ტერორისტული აქტი უწოდა.
