უკრაინის პრეზიდენტმა ვოლოდიმირ ზელენსკიმ განაცხადა, რომ „კურსკის“ კატასტროფა რუსეთის ფედერაციაში ვლადიმირ პუტინის მმართველობის დასაწყისი გახდა, ახლა კი კურსკი მისი ომის დასასრულად და კატასტროფად იქცა. ამის შესახებ ზელენსკიმ ვიდეომიმართვისას ისაუბრა.
„ჩვენ ვხედავთ, თუ როგორ მოძრაობს სინამდვილეში რუსეთი პუტინის დროს: 24 წლის წინ იყო „კურსკის“ კატასტროფა - მისი მმართველობის სიმბოლური დასაწყისი, და ახლაც ისევ კურსკი. მისი ომის კატასტროფა.
ეს ყოველთვის ემართება მათ, ვისაც სძულს ხალხი და ნებისმიერი წესი. რუსეთმა სხვებს მოუტანა ომი, ახლა ეს მის სახლში ბრუნდება. უკრაინას ყოველთვის მხოლოდ მშვიდობა სურდა და ჩვენ აუცილებლად უზრუნველვყოფთ მშვიდობას“, - განაცხადა ზელენსკიმ.
2000 წლის 12 აგვისტოს რუსული ატომური წყალქვეშა ნავი „კურსკი“ ბარენცის ზღვაში სწავლების დროს ჩაიძირა. დაიღუპა ბორტზე მყოფი 118-ვე ადამიანი.
„კურსკის“ კატასტროფა პუტინის პირველი ვადით პრეზიდენტობის დაწყებიდან სამ თვეში მოხდა.
2000 წლის სექტემბერში პუტინმა ინტერვიუ მისცა ამერიკელ ჟურნალისტს ლარი კინგს. შეკითხვაზე: „რა დაემართა წყალქვეშა ნავს?“ მან უპასუხა: „ის ჩაიძირა“.
შეგახსენებთ, უკრაინის შეიარაღებული ძალების მთავარსარდალმა ოლექსანდრ სირსკიმ შტაბის სხდომაზე დღეს განაცხადა: „უკრაინის შეიარაღებული ძალების ოპერაცია კურსკის რეგიონში გრძელდება. ამჟამად, რუსეთის ფედერაციის ტერიტორიის დაახლოებით 1000 კვადრატული კილომეტრი უკრაინის კონტროლს ექვემდებარება“.
