თავდაცვის მინისტრი ბაჩო ახალაია კრწანისის საწვრთნელ ბაზაზე მომხდარ ტრაგედიას სპეციალური განცხადებით გამოეხმაურა. მინისტრმა დაღუპული სამი სამხედროსა და მათი თანამებრძოლების ოჯახებს მიუსამძიმრა.
მისი თქმით, ამ ეტაპისთვის 13 სამხედრო მოსამსახურე ინტენსიური დაკვირვების ქვეშაა სამედიცინო დაწესებულებეში და მათ დასახმარებლად ყველაფერი კეთდება. ამავდროულად, მინისტრის თქმით, გარდაცვლილების ოჯახებთან მიმართებით სახელმწიფო კანონით ნაკისრ ყველა ვალდებულებას მაქსიმალურად შეასრულებს და მათ სოციალურ დაცვაზე იზრუნებს.
თავად ინცინდენტთან დაკავშირებით ბაჩო ახალაია აცხადებს, რომ მსგავსი წვრთვნები შეიარაღებულ ძალებში ყოველდღიურად და წლის განმავლობაში დიდი რაოდენობით ტარდება, რაც უცხო თვალისთვის სანახავი არაა. დღევანდელი სამწუხარო ინცინდენტის შესახებ კი ჯერჯერობით ბევრი რამ დადგენილი არაა.
"დღევანდელი ინცინდენტის გამოძიება სამხედრო პოლიციაში უკვე მიმდინარეობს. სრული სიმკაცრით დაისჯება კონკრეტულად ის სამხედრო მოსამსახურე, რომლის ბრალეულობა შეიძლება არსებობდეს. ის აუცილებლად იქნება მიცემული სისხლის სამართლის პასუხიგებაში",_აცხადებს ბაჩო ახალაია.
მისი თქმით, რიგ შემთხვევაში, ზოგადად წვრთნებს ახლავს ცალკეული მსგავსი ინცინდენტები. თუმცა ასეთი უბედური შემთხვევით არ უნდა დასრულდეს და ასეთი შედეგი არ უნად მივიღოთ.
შეგახსენებთ, დღეს 11.00 საათზე კრწანისის პოლიგონზე ჭურვი აფეთქდა, რასაც სამი სამხედროს სიცოცხლე შეეწირა, 13 კი დაიჭრა.
