აღსრულების ეროვნული ბიურო, 11 იანვარს "ასტრა პარკის" გასხვისებას უკვე მეორედ შეეცდება. განმეორებით აუქციონზე, ობიექტი გასასხვისებლად აღსრულების ეროვნული ბიუროს თბილისის სააღსრულებო ბიუროს აღმასრულებელს დავით კულდანაშვილს გამოაქვს.
აღსრულების ეროვნული ბიუროს ინფორმაციით, სარელიზაციოდ გამოტანილია შპს "ასტრა პარკის" საკუთრებაში რიცხული უძრავი ქონება. ობიექტის საწყისი ფასი პირველ აუქციონზე გამოცხადებული საწყისი ფასის 50%-ით განისაზღვრა და 1 მლნ. 158 ათას 500 ლარი შეადგენს.
იძულებით საჯარო აუქციონზე სარეალიზაციოდ გამოტანილია ასევე შპს "ასტრა დიღომი"-ს საკუთრებაში რიცხული უძრავი ქონებაც, რომლის საწყისი ფასიც, მეორე აუქციონზე 50 %-ით გაიაფდა და 352 ათას 500 ლარი შეადგინა.
განმეორებითი იძულებითი აუქციონი, საქართველოს იუსტიციის სამინისტროს სსიპ აღსრულების ეროვნული ბიუროს თბილისის სააღსრულებო ბიუროში, (მის: დავით აღმაშენებლის ხეივანი მე-10 კმ.) 2011 წლის 11 იანვარს 11:00 საათზე გაიმართება. ბიუროს ინფორმაციითვე, ქონება გარდამავალი უფლებით არის დატვირთული.
შეგახსენებთ, რომ გასართობი ცენტრი „ასტრა პარკი" 2007 წლის ოქტომბრიდან ფუნქციონირებს.
პარკის ერთ-ერთ მთავარ ღირსშესანიშნაობას წარმოადგენს კარტინგ-ცენტრი, რომელიც 2000 კვადრატულ მეტრზეა განთავსებული. სარბოლო ტრასა, რომელიც 320 მეტრს მოიცავს, თანამედროვე საფარითაა დაფარული, რაც უფრო კომფორტულსა და აზარტულს ხდის რბოლას.
სარბოლო მანქანები ფრანგული ფირმა „სოდიკარტის" წარმოებისაა, რომელიც ჰონდას 200 სმ3 ძრავითაა აღჭურვილი. ცენტრში შესაძლებელია როგორც მოზრდილთა, ასევე ასაკით შედარებით მცირეწლოვან მრბოლელთა მიღება. ტრასაზე ერთდროულად შესაძლებელია რვა მანქანის რბოლა და თითეოულის მაქსიმალური სიჩქარეა 70 კმ/სთ. მრბოლელთა უსაფრთხოება მაქსიმალურად დაცულია. მრბოლელები აღჭურვილნი არიან ჩაფხუტებითა და კისრის დამცავი სპეციალური კორსეტებით.
