ნატო-ს გენერალურმა მდივანმა იენს სტოლტენბერგმა აშშ-ის პრეზიდენტ ჯო ბაიდენთან შეხვედრისას განაცხადა, რომ 2024 წელს ალიანსის ევროპელი წევრებისა და კანადის თავდაცვის ხარჯები გაიზრდება 18%-ით, ხოლო ალიანსის 23 წევრი თვდაცვაზე მშპ-ის 2%-ს ან მეტს დახარჯავს.

თეთრ სახლში პრეზიდენტ ჯო ბაიდენთან მოლაპარაკების დროს სტოლტენბერგმა თქვა, რომ ნატო-ს მოკავშირეების რაოდენობა, რომლებიც ამ ხარჯების მიზნობრივ მაჩვენებლს შეასრულებენ, გაცილებით მეტია, ვიდრე ხუთი წლის წინ იყო. მაშინ ასეთი ქვეყნების რაოდენობა ათეულს არ აღემატებოდა.

„ევროპასა და კანადაში, ნატო-ს მოკავშირეები ზრდიან თავდაცვის ხარჯებს წელს 18%-ით, რაც ყველაზე დიდი ზრდაა ათწლეულების განმავლობაში და 23 მოკავშირე მზად არის წელს თავდაცვაზე დახარჯოს მშპ-ის 2% ან მეტი“ - თქვა ნატო-ს გენერალურმა მდივანმა.

სტოლტენბერგი ვაშინგტონში იმყოფება, რათა მოამზადოს ნატო-ს სამიტი აშშ-ს დედაქალაქში, რომელიც მომავალ თვეში იმართება.

ბაიდენმა თქვა, რომ ალიანსი ევროპისთვის ერთ-ერთ ყველაზე კრიტიკულ მომენტს აწყდება მეორე მსოფლიო ომის შემდეგ, ვიდრე უკრაინა ებრძვის რუსეთის ძალებს.

„ჩვენ გავაძლიერეთ ნატო-ს აღმოსავლეთი ფლანგი, რაც ცხადყოფს, რომ ჩვენ დავიცავთ მისი ტერიტორიის თითოეულ სანტიმეტრს“, - თქვა ბაიდენმა.

სტოლტენბერგმა აღნიშნა, რომ როდესაც ნატო-ს ლიდერებმა 2014 წლის სამიტზე მშპ-ს 2% დაადგინეს, მას მხოლოდ სამი წევრი ასრულებდა - აშშ, საბერძნეთი და დიდი ბრიტანეთი. მაშინ ნატო-ს 28 წევრი ჰყავდა, ახლა კი - 32.

შეხვედრის შემდეგ ჟურნალისტებთან საუბრისას სტოლტენბერგმა განაცხადა, რომ ნატო-ს წევრი ქვეყნების სამხედრო ხარჯების გაზრდის ტენდენცია გამოწვეული იყო რუსეთის მიერ 2014 წელს ყირიმის ანექსიით.

სტოლტენბერგმა განაცხადა, რომ ნატო-ს თავდაცვის ხარჯები იქნება მთავარი თემა ალიანსის სამიტზე მომავალ თვეში ვაშინგტონში, შემდეგ კი უკრაინაში რუსეთის ომზე იმსჯელებენ. მან ასევე მოუწოდა აღარ განმეორდეს აშშ-ის მიერ უკრაინისთვის სამხედრო დახმარების შეფერხება, როგორც ეს ამ წლის დასაწყისში მოხდა.