ლიბანში აშშ-ის საელჩომ განაცხადა, რომ დღეს დილით საელჩოს შესასვლელთან სროლა მოხდა.
დიპლომატიური მისიის განცხადებით, შენობა და თანამშრომლები ამჟამად უსაფრთხოდ არიან, ხოლო აშშ-ის ელჩი ლიბანში ლიზა ჯონსონი ამჟამად ქვეყნის ფარგლებს გარეთ იმყოფება.
ლიბანის არმია იტყობინება, რომ ოთხშაბათს, სირიის მოქალაქემ ცეცხლი გახსნა ბეირუთში ამერიკის საელჩოს წინ, რის შედეგაც ორმხრივი სროლა მოხდა საელჩოს დაცვასა და თავდამსხმელს შორის , რომლის დროსაც თავდამსხმელი დაიჭრა. ის დააკავეს და კლინიკაში გადაიყვანეს.
ლიბანის უსაფრთხოების წყარომ Reuters-ს განუცხადა, რომ ლიბანის საელჩოს უსაფრთხოების ოფიცერი მსუბუქად დაიჭრა. თეთრი სახლის ეროვნული უსაფრთხოების მრჩეველმა ჯეიკ სალივანმა მოგვიანებით NBC News-ს დაუდასტურა, რომ ლიბანის საელჩოს მცველი დაიჭრა და სამედიცინო დახმარება ჩაუტარდა.
ლიბანის უსაფრთხოების სამსახურის მაღალჩინოსანმა Reuters-ს განუცხადა, რომ იძიებენ შეიარაღებული პირის შესაძლო კავშირს ისლამურ სახელმწიფოსთან.
