"ქართულმა პარტიამ" საქართველოს მთავარი პროკურორ მურთაზ ზოდელავას 2011 წლის 3 იანვარს თბილისში, აფხაზეთში დაღუპულთა მემორიალთან მიმდინარე საპროტესტო აქციის დროს მომხდარი დანაშაულის გამოძიება მოსთხოვა. საჩივარი პროკურატურაში დღეს "ქართული პარტიის" იურისტმა ალექსანდრა ობოლაძემ შეიტანა.
პროკურატურაში შეტანილ საჩივარს თან ერთვის ვიდეომასალა, რომელშიც კარგად ჩანს დამნაშავის სახე და თუ სამართალდამცავები მოინდომებენ, მისი ვინაობის დადგენა არ გაუჭირდებათ.
პარტიის ინფორმაციით, ვეტერანი მეომრების აქციის ძალის გამოყენებით დაშლის დროს, სამოქალაქო ფორმაში ჩაცმულმა ჯერჯერობით დაუდგენელმა პირებმა ფიზიკური შეურაცხყოფა მიაყენეს „ქართული პარტიის" ისნის რაიონული ორგანიზაციის თავმჯდომარეს ეკა მათიაშვილს და პარტიის ახალგაზრდული ორგანიზაციის ერთ-ერთ ლიდერს შოთა იამანიძეს.
„ჩვენ არა გვაქვს ზედმეტი მოლოდინი და იმის იმედი, რომ ეს დანაშაული ობიექტურად იქნება გამოძიებული და დამნაშავე საკადრისად დაისჯება, მაგრამ ყველა სამართლებრივ პროცედურას მაინც ბოლომდე გავივლით. არ შევეგუებით არანაირ ძალადობას, მით უმეტეს, როდესაც ის ცინიკური ფორმით და დემონსტრაციულად არის გამოხატული", - აცხადებს "ქართული პარტიის" წარმომადგენელი კოკა გუნცაძე.
"ჩვენი ინფორმაციით, ეს პიროვნება ვინმე ოთარ გვენეტაძეა", - აღნიშნავს „ქართული პარტიის" გენერალური მდივანი. „ქართული პარტია" იწყებს პოლიციის ე.წ „ზონდერჯგუფების" წინააღმდეგ მიმართულ კამპანიას, რომელიც არ დასრულდება, ვიდრე არ მოხდება ამ ჯგუფების მთლიანი დემორალიზება და ქვეყანაში არ შეიქმნება აზრის თავისუფლად გამოხატვის შესაძლებლობა.
„ქართული პარტია" საქართველოს მთავარი პროკურორისგან მოითხოვს ზემოთ აღნიშნულ დანაშაულთან დაკავშირებით სისხლის სამართლის საქმის გამოძიების დაწყებას, დამნაშავეების გამოვლენას და მათ დასჯას.
