საქართველოში გამართული შეხვედრების შემდეგ, ევროპისა და ევრაზიის საკითხებში აშშ-ის სახელმწიფო მდივნის თანაშემწემ ჯიმ ო’ბრაიენი ბრიფინგი გამართა, სადაც საქართველოში არსებული მდგომარეობისა და აშშ-ის მხრიდან მოსალოდნელი რეაგირების შესახებ ისაუბრა.
ვიზიტის ფარგლებში, ო’ბრაიენი შეხვდა პრემიერ-მინისტრ კობახიძეს, პრეზიდენტ სალომე ზურაბიშვილს, პარლამენტი თავმჯდომარეს შალვა პაპუაშვილსა და ოპოზიციონერ პოლიტიკოსებს.
ჯიმ ო’ბრაიენის განცხადებით, თუ "უცხოეთის აგენტების" კანონი დარჩება იმ ფორმით, როგორც ახლაა და არ მოვა ევროკავშირის ნორმებთან შესაბამისობაში, ასევე გაგრძელდება დემოკრატიის უკუსვლა, ვაშინგტონი სანქციების დაწესებაზე იმსჯელებს.
"თუკი ეს კანონი დარჩება ისე, როგორც დღეს არის და არ იქნება შესაბამისობაში ევროკავშირის სტანდარტებთან, თუკი დავინახავთ, რომ არის დემოკრატიის შესუსტება და ძირის გამოთხრა, ძალადობა მშვიდობიანი დემონსტრანტების მიმართ, რა თქმა უნდა, ამერიკის შეერთებული შტატებიდან იქნება შეზღუდვები, იქნება ეს ფინანსური თუ გადაადგილების შეზღუდვა იმ ადამიანებისა და მათი ოჯახის წევრების მიმართ, ვინც პასუხისმგებელი იქნებიან ამ ქმედებებზე", - თქვა დიპლომატმა.
ამასთან, ჯიმ ო'ბრაიენმა არარეალისტური უწოდა კონსპირაციის თეორიებს "გლობალური ომის პარტიის" შესახებ.
"რაც შეეხება გლობალური ომის პარტიის კონსპირაციის თეორიებს და იმას თითქოს, გლობალური ომის პარტიას სურს "ქართული ოცნება" აღარ იყოს ხელისუფლებაში, მათი 12-წლიანი მმართველობის შემდეგ. ჩემი აზრით, ესაა ძალიან არარეალისტური, არასწორი გაგება საერთაშორისო საზოგადოების ერთგულებისა საქართველოს მიმართ", - თქვა მან.
ო'ბრაიენმა ასევე უპასუხა გავრცელებულ ინფორმაციას ბიძინა ივანიშვილის სანქცირების შესახებ და განაცხადა, რომ "ამ ეტაპზე" ბიძინა ივანიშვილის მიმართ სანქციები არაა დაწესებული.
