"ქართული პარტიის" ლიდერი და "რუსთავის მედიის მართვის" კომპანიის დამფუძნებელი ეროსი კიწმარიშვილი "მაესტროს" ხელმძღვანელების მოთხოვნის დაკმაყოფილებას და "ტელეკომპანიის წინაშე არსებული დავალიანების" დაფარვას არ აპირებს.
მიზეზი მარტივია - კიწმარიშვილი "მაესტროს" წინაშე არსებულ დავალიანებას არ აღიარებს.
როგორც "ჯი-ეიჩ-ენს" "ქართულ პარტიაში" განუცხადეს, "მაესტროსა" და მისი ხელმძღვანელების ბრალდებებთან დაკავშირებით ეროსი კიწმარიშვილმა განცხადება უკვე გააკეთა და ამით თემა ამოწურა.
"ბატონმა ეროსიმ უკვე გააკეთა "მაესტროს" ხელმძღვანელების ბრალდებებთან დაკავშირებით განცხადება და ამ საკითხზე მეტ კომენტირებას არ აპირებს", - აცხადებენ პარტიაში.
შეგახსენებთ, რომ 31 დეკემბერს კიწმარიშვილმა "მაესტროს" დამფუძნებლის მამუკა ღლონტის ბრალდებების საპასუხოდ განაცხადა, რომ ის "9 თვეზე მეტია არანაირ მონაწილეობას არ იღებს "მაესტროს" მართვაში".
"მოვუწოდებ მაესტროს ყოფილ დირექტორს და მაესტროს დამფუძნებლებს ნუ ახდენენ ტელეკომპანიასა და მმართველ კომპანიას შორის არსებული სამეურნეო ხასიათის პრობლემებისა და დავის პოლიტიზაციას. მეც და მთლიანად ქართული პარტია კიდევ ერთხელ მხარს ვუჭერთ თავისუფალ მედიას და ყველა ქართველ ჟურნალისტს ვულოცავთ დამდეგ შობა-ახალ წელს", - განაცხადა კიწმარიშვილმა.
თავის მხრივ, შეგახსენებთ იმასაც, რომ მამუკა ღლონტმა ეროსი კიწარიშვილს, როგორც "მაესტროს" მმართველი კომპანიის - "რუსთავის მედიის მართვის კომპანიის" დამფუძნებელს მოუწოდა "სრულად დაფაროს ტელეკომპანიის წინაშე არსებული დავალიანება", რისთვისაც 10 დღიანი ვადა მისცა.
