დიასპორის საკითხებში სახელმწიფო მინისტრმა პაპუნა დავითაიამ 2010 წლის შემაჯამაბელი ბრიფინგი გამართა. განვლილი წლის შეჯამებასთან ერთად მან 2011 წლის გეგმებზეც ისაუბრა.
დავითაიას თქმით, 2011 წელს მისი უწყების პრიორიტეტი დიასპორასთან კავშირების სრულყოფა, დიასპორის სტატუსის განსაზღვრა, დიასპორის პოტენციალის ჩართვა ქვეყნის განვითარების პროცესში, ეკონომიკური, საგანმანათლებლო და კულტურული პროგრამები იქნება.
2011 წლის პარლამენტის საგაზაფხულო სესიაზე შევა უცხოეთში მცხოვრები ქართველების შესახებ კანონპროექტი, რომელიც ითვალისწინებს უცხოეთში მცხოვრები თანამემამულის სტატუსის განსაზღვრას, უცხოეთში მცხოვრებ თანამემამულეებისთვის სპეციალური მოწმობების მიცემას, საპატიო წარმომადგენლის დანიშვნას დიასპორის საკითხებში, დიასპორული ორგანიზაციების სტატუსის განსაზღვრას და სტატუსის მქონეთა უფლება/მოვალეობის განსაზღვრას.
დავითაიას თქმით, ეს ხელს შეუწყობს, რომ დიასპორა გახდეს უფრო შეკრული, ხოლო თანამემამულეებს მიეცემათ მეტი სტიმული მიიღონ მონაწილეობა ქვეყანაში მიმდინარე პროცესებში, სამინისტროს კი უფრო სრულყოფილი მონაცემები დიასპორის შესახებ.
2011 წელს ამოქმედდება ინტერნეტ ტელევიზია. "ჩვენი დიასპორა ძირითადად წარმოდგენილია 35 ქვეყანაში. ისინი სხვადასხვა დროის სარტყელში ცხოვრობენ. ინფორმაციას ძირითადად ინტერნეტიდან იღებენ. დიასპორის სიდიდიდან გამომდინარე ინტერნეტ-ტელევიზია იქნება პოპულარული რესურსი, რომელიც პერიოდულად შექმნის სიუჟეტებს და გადაცემებს დიასპორის შესახებ. დღემდე არ არსებობს პირდაპირ მაუწყებლობაზე დაფუძნებული ქართული ინტერნეტ-ტელევიზია", - განმარტავს პაპუნა დავითაია კანცელარიაში გამართულ ბრიფინგზე.
