- ბატონო სულხან, 2010 წელი "საქართველოს სახელმწიფო ელექტროსისტემისათვის" პროდუქტიული და დატვირთული იყო. რას გვეტყვით 2010 წელს ჩატარებული სამუშაოების შესახებ?

- მიუხედავად ძალიან რთული წლისა, "საქართველოს სახელმწიფო ელექტროსისტემამ" და მისმა შვილობილმა კომპანიებმა შეძლეს ყველა დაწყებული პროექტის გეგმის მიხედვით განხორციელება. ქვესადგურებში აქტიურად მიმდინარეობდა ელექტრომოწყობილობების რეაბილიტაცია. განახლებული და გარემონტებულია რეგიონალური ქსელის ოფისები. სარემონტო სამუშაოები ჩაუტარდა ქვესადგურის შენობებს, რეგიონალური ქსელის ოფისებს, ჩატარდა შემოღობვითი სამუშაოები.

მნიშვნელოვანი სარეაბილიტაციო სამუშაოები ჩატარდა რეგიონალური ქსელების თითქმის ყველა ქვესადგურში. განსაკუთრებულად გამოვყოფ ქვესადგურს "გარდაბანი-500", რომლის დიდი ნაწილი რეაბილიტირებულია, დარჩენილი მცირე ნაწილის რეაბილიტაცია კი, გათვალისწინებულია მომავალი წლის სამუშაო გეგმაში. ეს პროექტი იმ კუთხითაც არის მნიშვნელოვანი, რომ პირველად კომპანიის ისტორიაში, სსე-ის და კომპანია "სიმენსის" თანამშრომლების ერთობლივი მუშაობის შედეგად, შევძელით სამუშაოები დაგვემთავრებინა ზუსტად დათქმულ ვადებში, დაგვიანების გარეშე.

ქვესადგურის სრული რეაბილიტაცია მიმდინარეობს თბილისში, "ნავთლუღი-220"-ში. უკვე ჩატარებულია საკმაოდ დიდი მოცულობის სამუშაო, ნაწილი კი 2011 წელს დასრულდება.

ძალიან მნიშვნელოვანი სამუშაოები ჩატარდა ხაშურში, გორში, ზესტაფონსა და ქუთაისში. იმერეთის რეგიონში კიდევ ერთ ქვესადგურს გამოვყოფდი - "ფერო-220", სადაც უმოკლეს დროში განხორციელებულმა პროექტმა შესაძლებლობა მოგვცა მნიშვნელოვნად გაგვეუმჯობესებინა ელექტროენერგიის მიწოდების ხარისხი და იმედიანობა. აღსანიშნავია აჭარა-გურია-სამეგრელოს რეგიონალურ ქსელში მიმდინარე პროექტებიც. მასშტაბური სამუშაოები მიმდინარეობს ქვესადგურებში "მენჯი-220" და "ბათუმი-220". გამოვიყენებ შესაძლებლობას და თქვენი გაზეთის მეშვეობით აღნიშნული რეგიონალური ქსელის თანამშრომლებს მივულოცავ ახლადგარემონტებულ და მოწყობილ სათაო ოფისს, რომელიც ზუგდიდში მდებარეობს და ერთ-ერთი საუკეთესოა სსე-ის შენობებს შორის.

აქვე მინდა აღვნიშნო, რომ წელსვე თბილისის რეგიონალური ქსელის თანამშრომლებს მნიშვნელოვნად გაუუმჯობესდებათ სამუშაო პირობები. წლის ბოლომდე ისინი სრულიად ახალ, თანამედროვე ინფრასტრუქტურით მოწყობილ ოფისში გადავლენ. მომავალ წელს კი დაგეგმილია ქვემო ქართლის რეგიონალური ქსელის ახალი სათაო ოფისის მოწყობა გარდაბანში.

- როგორც ცნობილია, "საქართველოს სახელმწიფო ელექტროსისტემა" სამუშაოს დიდ მოცულობას საკუთარი ძალებით ახორციელებს.

- დიახ, დღეს სსე ბევრ სამუშაოს საკუთარი ძალებით ახორციელებს. მაგალითად, ტრანსფორმატორების რემონტს, რაც მნიშვნელოვან ფინანსურ დანაზოგს წარმოადგენს. ეს, რა თქმა უნდა, რთულია მენეჯმენტის მხრივ, მაგრამ საშუალებას გვაძლევს დიდი მოცულობის სამუშაო შემცირებულ ვადებში შევასრულოთ. ჩამოყალიბდა ტრანსფორმატორების სარემონტო ჯგუფი, რომელიც აღიჭურვა თანამედროვე მოწყობილობებით. წელს მათ რამდენიმე ტრანსფორმატორს უკვე ჩაუტარეს რემონტი.

ასევე ჩამოყალიბდა სარემონტო ჯგუფი, რომელიც აკეთებს ფუნდამენტებს, საკაბელო არხებსა და ფილებს. წელს, ეს ჯგუფი გარდაბანში მუშაობს. ამ კუთხით მომავალ წელსაც გავაქტიურდებით და შევეცდებით, რაც შეიძლება მეტი მოცულობის სამუშაო შევასრულოთ ჩვენი ძალებით.

- 2010 წელს საფუძველი ჩაეყარა შავი ზღვის გადამცემი ხაზის პროექტს. რა ეტაპზეა ამჟამად ეს პროექტი?

- ქვესადგურიდან "გარდაბანი-500" გამომავალი 500 კვ.-იანი ელექტროგადამცემი ხაზის "ვარძია" პირველი 30კმ. საკუთარი ძალებით ავაშენეთ. ეს არის პირველი პრეცედენტი, როდესაც ქართულმა კომპანიამ შეძლო 500 კვ-იანი ხაზის ნაწილობრივი რეაბილიტაცია. ამ ეტაპზე მიმდინარეობს 1-დან 39 ანძამდე სადენის გაჭიმვის სამუშაოები. მნიშვნელოვანია, რომ პირველ 10 კმ-ზე გადაჭიმული სადენი გადაებმება 500 კილოვოლტიან ხაზს "მუხრანი". ეს იქნება "ქართლი 1"-ის დამზღვევი ხაზი, რომელიც გამოვა ქსნიდან და გარდაბანს დაუკავშირდება. ეს ნიშნავს, რომ საქართველოს ენერგომომარაგება კიდევ უფრო სტაბილური და საიმედო იქნება.

მომავალი წლის ყველაზე მნიშვნელოვან პროექტს წარმოადგენს შავი ზღვის გადამცემი ხაზის პროექტი, რომელიც წელს დაიწყო, აქტიურ ფაზაში 2011 წელს შევა და 2012 წლის მაისში დასრულდება. ეს პროექტი მნიშვნელოვანია არა მარტო საქართველოსთვის, არამედ მთელი რეგიონისათვის.

2010 წელი მნიშვნელოვანია იმითაც, რომ ჩვენ შევძელით ქვესადგურ "მენჯი-220"-დან ფოთის თავისუფალ ეკონომიკურ ზონამდე ახალი ხაზის აშენება. პროექტის შესასრულებლად გამოცხადდა 14 დამოუკიდებელი ტენდერი. ხაზი დაახლოებით რვა თვეში აშენდა. პროექტი დღეს დასრულებულია და ხაზი მზად არის ფოთის თვისუფალი ეკონომიკური ზონის ელექტროენერგიით მოსამარაგებლად.

მომავალ წელს დაგეგმილია ახალი 500 და 220კვ-იანი გადამცემი ხაზების მშენებლობა. მიმდინარეობს აქტიური მოლაპარაკებები აზერბაიჯანულ მხარესთან. სავარაუდოდ ახალი გადამცემი ხაზის პროექტი იქნება აზერბაიჯანთან დამაკავშირებელი ახალი 500 კვ-იანი ელექტროგადამცემი ხაზი.

- რეაბილიტაციის პროგრამა ალბათ მომდევნო წელსაც გაგრძელდება. რას გეგმავს "საქართველოს სახელმწიფო ელექტროსისტემა" 2011 წელს?

- რასაკვირველია, ჩვენ გავაგრძელებთ ქვესადგურებში ახალი ელექტრომოწყობილობების დამონტაჟებას და ძალოვანი ტრანსფორმატორების რეაბილიტაციას. მომავალი წლის ამ დროისათვის, ქვესადგურებში მოწყობილობების 90%-ზე მეტი რეაბილიტირებული იქნება. წელს ჩვენ სირთულეებიც გვქონდა. რაც გამოწვეული იყო როგორც სუბიექტური, ასევე ობიექტური მიზეზებით. იყო შეცდომებიც, განსაკუთრებით სარელეო დაცვის კუთხით. ამიტომ მომავალ წელს გავაძლიერებთ მუშაობას ამ მიმართულებით.

დაწყებული გვაქვს მუშაობა პროექტზე, რომელიც ითვალისწინებს ავარიის საწინააღმდეგო ავტომატიკის დანერგვას საქართველოში. მომავალ წელს იგეგმება საპილოტო პროექტის გაკეთება. ასევე ვფიქრობთ ქვესადგურებში სარელეო დაცვის სრულ რეაბილიტაციას და ქვეყანაში სასისტემო ავარიის საწინააღმდეგო ავტომატიკის დანერგვას. ამ მიზნით, უკვე მიმდინარეობს მოლაპარაკებები სხვადასხვა საერთაშორისო-საფინანსო ორგანიზაციებთან. პროექტების განხორციელება ძალზედ მნიშვნელოვანია, როგორც კომპანიისთვის, ასევე ქვეყნისთვისაც. გვინდა, რომ აშენდეს ახალი ჰიდროელექტროსადგურები, გაიზარდოს ექსპორტი მეზობელ ქვეყნებში. დარწმუნებული ვარ, შორს არ არის ის დღე, როცა ჩვენ განახლებადი ენერგიის ექსპორტს ევროპის ქვეყნებშიც განვახორციელებთ. ამ ყველაფრის განსახორციელებლად აუცილებელია, მაღალი ძაბვის გადამცემი ხაზების ინფრასტურქტურა იყოს გამართული და საიმედო.

კომპანია აქტიურად ატარებს თრეინინგებს. მომავალი თაობის განათლებაზე ზრუნვა და მის აღზრდაში მონაწილეობის მიღება ძალიან მნიშვნელოვანია ჩვენი დარგის განვითარებისათვის. მომავალ წელს, სარელეო დაცვის და SCADA
-ს სისტემების კუთხით დაგეგმილია სსე-ის თანამშრომლების გაგზავნა ევროპაში, სამკვირიან თრეინინგებზე. რამდენიმე თანამშრომელი სასწავლებლად ამერიკაშიც გაემგზავრება.

ჩვენ მუდმივად ვზრუნავთ, რომ სსე-ის თანამშრომლებს კარგი სამუშაო პირობები შევუქმნათ. ხელფასები სტაბილურია და ზოგ შემთხვევაში არის ზრდის ტენდენციაც. შემოღებულია პრემირების სისტემა. უკვე მეორე წელია არსებობს თანამშრომლების სამედიცინო დაზღვევა. დაზღვევის თანხის გადაფარვას სსე მომავალ წელსაც გააგრძელებს. სადაზღვევო კომპანიასთან გამართული მოლაპარაკებების შედეგად, სსე-ს თანამშრომლები მომავალ წელს ბევრად უკეთესი პირობებით დაეზღვევიან.
აქვე, ვისარგებლებ შემთხვევით და შობა-ახალი წლის დღესასწაულს მივულოცავ ყველა თანამშრომელს და მათ ოჯახებს. ნაყოფიერი, წარმატებული, ბედნიერებისა და სიხარულის მომტანი ყოფილიყოს თქვენთვის 2011 წელი.